மேலோட்டம்

பெற்றோர் அல்லது பாதுகாவலர் தமது ChatGPT கணக்கைப் பதின்ம வயதினரின் கணக்குடன் இணைக்கவும், குறிப்பிட்ட அமைப்புகளை நிர்வகிக்கவும், நேர அட்டவணைகளை அமைக்கவும், குறிப்பிட்ட சில சூழல்களில் பாதுகாப்பு அறிவிப்புகளைப் பெறவும் பேரென்டல் கண்ட்ரோல்ஸ் உதவுகின்றன.

கணக்குகளை இணைப்பதால், பதின்ம வயதினரின் உரையாடல்கள், அரட்டை வரலாறு அல்லது நிகழ்நேரச் செயல்பாடுகளைப் பெற்றோர் அல்லது பாதுகாவலர் அணுக முடியாது. இருவரில் எவர் வேண்டுமானாலும் எந்த நேரத்திலும் கணக்குகளின் இணைப்பை நீக்கலாம்.

ஒரு பெற்றோர் அல்லது பாதுகாவலர் பல பதின்ம வயதினரின் கணக்குகளுடன் தமது கணக்கை இணைக்கலாம். ஒவ்வொரு பதின்ம வயதினரும் ஒரே நேரத்தில் ஒரு பெற்றோர் அல்லது பாதுகாவலருடன் மட்டுமே கணக்கை இணைக்க முடியும்.

உங்கள் கணக்குகளை இணைக்கவும்

பெற்றோர் அல்லது பாதுகாவலர் அல்லது பதின்ம வயதினர் என எவர் வேண்டுமானாலும் அழைப்பைத் தொடங்கலாம்.

பதின்பருவத்தினரை அழைக்கவும்

இணையத்தில், உங்கள் பதின்பருவக் குழந்தையின் தொலைபேசி எண் அல்லது மின்னஞ்சல் முகவரியைப் பயன்படுத்தி அவர்களை அழைக்கலாம்:

1. உங்கள் சுயவிவர மெனுவிலிருந்து அமைப்புகள் என்பதைத் திறக்கவும்.

2. பேரென்டல் கண்ட்ரோல்ஸ் என்பதைத் தேர்ந்தெடுக்கவும்.

3. குடும்ப உறுப்பினரைச் சேர்க்கவும் என்பதைத் தேர்ந்தெடுக்கவும்.

4. குடும்ப உறுப்பினரை அழைக்கவும் என்பதன் கீழ், தொலைபேசியைப் பயன்படுத்தவும் அல்லது மின்னஞ்சலைப் பயன்படுத்தவும் என்பதைத் தேர்ந்தெடுக்கவும்.

5. உங்கள் பதின்பருவக் குழந்தையின் தொலைபேசி எண் அல்லது மின்னஞ்சல் முகவரியை உள்ளிடவும்.

6. அனுப்பவும் என்பதைத் தேர்ந்தெடுக்கவும்.

தங்கள் ChatGPT கணக்கை இணைப்பதற்கான இணைப்புடன் கூடிய குறுஞ்செய்தி அல்லது மின்னஞ்சலை உங்கள் பதின்பருவக் குழந்தை பெறுவார்கள். ChatGPT-இலும் அவர்களுக்கு அறிவிப்பு வரலாம்.

உங்கள் பதின்பருவக் குழந்தை அழைப்பை ஏற்றதும், அவர்களின் அமைப்புகளைப் பார்க்க அல்லது மாற்ற, குடும்ப உறுப்பினர்கள் என்பதன் கீழ் அவர்களின் பெயரைத் தேர்ந்தெடுக்கவும்.

பெற்றோர் அல்லது பாதுகாவலரை அழைக்கவும்

நீங்கள் பதின்பருவத்தினராக இருந்தால், கணக்குகளை இணைக்கப் பெற்றோர் அல்லது பாதுகாவலரை அழைக்கலாம்:

1. அமைப்புகள் > பேரென்டல் கண்ட்ரோல்ஸ் என்பதற்குச் செல்லவும்.

2. பெற்றோரை அழைக்கவும் என்பதைத் தேர்ந்தெடுக்கவும்.

3. தொலைபேசியைப் பயன்படுத்தவும் அல்லது மின்னஞ்சலைப் பயன்படுத்தவும் என்பதைத் தேர்ந்தெடுக்கவும்.

4. உங்கள் பெற்றோர் அல்லது பாதுகாவலரின் தொலைபேசி எண் அல்லது மின்னஞ்சல் முகவரியை உள்ளிடவும்.

5. அனுப்பவும் என்பதைத் தேர்ந்தெடுக்கவும்.

உங்கள் பெற்றோர் அல்லது பாதுகாவலர் அழைப்பை ஏற்றதும், அவரது பெயர் குடும்ப உறுப்பினர்கள் என்பதன் கீழ் தோன்றும். எந்த அமைப்புகள் இயக்கப்பட்டுள்ளன அல்லது முடக்கப்பட்டுள்ளன என்பதை நீங்கள் பார்க்கலாம். ஆனால், உங்கள் பெற்றோர் அல்லது பாதுகாவலர் நிர்வகிக்கும் அமைப்புகளை மாற்ற முடியாது.

உங்கள் பெற்றோர் அல்லது பாதுகாவலர் ஏற்கெனவே உங்களை அழைத்திருந்தால், அமைப்புகள் > பேரென்டல் கண்ட்ரோல்ஸ் என்பதற்குச் சென்று, அழைப்பை ஏற்கவும் என்பதைத் தேர்ந்தெடுக்கவும்.

அழைப்புச் சிக்கல்களைத் தீர்க்கவும்

அழைப்பு இணைப்பு ChatGPT-ஐத் திறந்தும், அழைப்பை ஏற்கும் விருப்பம் காட்டப்படவில்லை என்றால்:

1. அழைப்பைப் பெற்ற மின்னஞ்சல் முகவரி அல்லது தொலைபேசி எண்ணுடன் தொடர்புடைய தனிப்பட்ட ChatGPT கணக்கில் இணையதளம் வழியாக உள்நுழையவும்.

2. அமைப்புகள் > பேரென்டல் கண்ட்ரோல்ஸ் என்பதற்குச் செல்லவும்.

3. நிலுவையில் உள்ள அழைப்பைத் திறந்து, ஏற்கவும் என்பதைத் தேர்ந்தெடுக்கவும்.

அழைப்பை அனுப்பியவர் அமைப்புகள் > பேரென்டல் கண்ட்ரோல்ஸ் என்பதற்குச் சென்று, அழைப்பு அனுப்பப்பட்டது எனக் குறிக்கப்பட்ட நபரைத் தேர்ந்தெடுத்து, அழைப்பை மீண்டும் அனுப்பவும் என்பதைத் தேர்ந்தெடுக்கலாம்.

அழைப்பு தவறான மின்னஞ்சல் முகவரி அல்லது தொலைபேசி எண்ணுக்கு அனுப்பப்பட்டிருந்தால், அனுப்பியவர் அழைப்பை ரத்துசெய்யவும் என்பதைத் தேர்ந்தெடுத்து, சரியான கணக்கிற்குப் புதிய அழைப்பை அனுப்பலாம். அழைப்பு காலாவதியாகியிருந்தால் அல்லது ரத்துசெய்யப்பட்டிருந்தால், புதிய அழைப்பை அனுப்பவும்.

இன்னும் அழைப்பை ஏற்க முடியவில்லை என்றாலோ, இணைக்கப்பட்ட கணக்கு காணாமல் போனாலோ, உங்கள் கணக்குகளில் இணைப்பு பற்றிய தகவல்கள் முரண்பட்டாலோ, ஹெல்ப் சென்டர் வழியாக OpenAI ஆதரவுக் குழுவைத் தொடர்புகொள்ளவும். பிழைச் செய்தி தோன்றினால், அதை அப்படியே சேர்க்கவும்.

பேரென்டல் கண்ட்ரோல்ஸை நிர்வகிக்கவும்

உங்கள் பதின்பருவக் குழந்தை உங்கள் அழைப்பை ஏற்றதும், அமைப்புகள் > பேரென்டல் கண்ட்ரோல்ஸ் என்பதற்குச் சென்று, குடும்ப உறுப்பினர்கள் என்பதன் கீழ் உங்கள் குழந்தையைத் தேர்ந்தெடுக்கவும்.

பின்வரும் அமைப்புகளை நீங்கள் நிர்வகிக்கலாம்:

• உணர்வுகளைப் பாதிக்கக்கூடிய உள்ளடக்கத்தைக் குறைக்கவும்: உணர்வுகளைப் பாதிக்கக்கூடிய அல்லது வயதிற்குப் பொருத்தமற்ற உள்ளடக்கத்தைக் குறைக்க உதவும் பாதுகாப்புகளைச் சேர்க்கிறது.

  • இயல்புநிலை: இயக்கப்பட்டுள்ளது

• அனைவருக்காகவும் மாடலை மேம்படுத்தவும்: ChatGPT மாடல்களை மேம்படுத்த உங்கள் பதின்பருவக் குழந்தையின் உரையாடல்களைப் பயன்படுத்தலாமா என்பதைக் கட்டுப்படுத்துகிறது.

  • இயல்புநிலை: இயக்கப்பட்டுள்ளது

• சேமித்த நினைவுகளைப் பயன்படுத்தவும்: பதில்களைத் தனிப்பயனாக்க ChatGPT சேமித்த நினைவுகளைப் பயன்படுத்தலாமா என்பதைக் கட்டுப்படுத்துகிறது.

  • இயல்புநிலை: கிடைக்கும் இடங்களில் இயக்கப்பட்டுள்ளது; சில பிராந்தியங்களில் இயல்பாகவே முடக்கப்பட்டிருக்கலாம்

• Health: ஆதரிக்கப்படும் உடல்நலத் தரவு மூலங்களை இணைப்பது உட்பட, உங்கள் பதின்பருவக் குழந்தை ChatGPT Health-ஐப் பயன்படுத்தலாமா என்பதைக் கட்டுப்படுத்துகிறது.

  • இயல்புநிலை: Health கிடைக்கும் இடங்களில் இயக்கப்பட்டுள்ளது

• Codex பிணைய அணுகல்: ChatGPT வேலை இயக்கும் நிரல், பொது இணையதளங்கள் மற்றும் பயன்பாட்டு நிரலாக்க இடைமுகங்கள் உள்ளிட்ட இணையச் சேவைகளுடன் இணையலாமா என்பதைக் கட்டுப்படுத்துகிறது.

  • இயல்புநிலை: இயக்கப்பட்டுள்ளது

• மேகக்கணி உலாவி: ChatGPT வேலை அதன் உள்ளமைந்த மேகக்கணி உலாவி மூலம் பொது இணையதளங்களுக்குச் செல்லலாமா என்பதைக் கட்டுப்படுத்துகிறது.

  • இயல்புநிலை: இயக்கப்பட்டுள்ளது

• வாய்ஸ் மோடு: உங்கள் பதின்பருவக் குழந்தை வாய்ஸ் மோடைப் பயன்படுத்தலாமா என்பதைக் கட்டுப்படுத்துகிறது.

  • இயல்புநிலை: இயக்கப்பட்டுள்ளது

• இமேஜ் ஜெனரேஷன்: ChatGPT வேலை உட்பட ChatGPT-இல் உங்கள் பதின்பருவக் குழந்தை படங்களை உருவாக்கவும் திருத்தவும் முடியுமா என்பதைக் கட்டுப்படுத்துகிறது.

  • இயல்புநிலை: இயக்கப்பட்டுள்ளது

• ஸ்டடி மோடு: முதன்மை ChatGPT அனுபவத்தில் புதிய உரையாடல்கள் ஸ்டடி மோடு இயக்கப்பட்ட நிலையில் தொடங்க வேண்டுமா என்பதைக் கட்டுப்படுத்துகிறது. இந்த அமைப்பு GPT அல்லது திட்ட உரையாடல்களுக்குப் பொருந்தாது.

  • இயல்புநிலை: முடக்கப்பட்டுள்ளது

• படிப்பு நேரம்: முதன்மை ChatGPT அனுபவத்தில் தகுதியுள்ள புதிய உரையாடல்கள் ஸ்டடி மோடில் தொடங்குவதற்கான நேர அட்டவணையை விருப்பத்திற்கேற்ப அமைக்கிறது. படிப்பு நேரம் ChatGPT-க்கான அணுகலைத் தடுக்காது.

  • இயல்புநிலை: முடக்கப்பட்டுள்ளது; நேரம் எதுவும் திட்டமிடப்படவில்லை

• ஓய்வு நேரம்: ChatGPT வேலை உட்பட ChatGPT-ஐ உங்கள் பதின்பருவக் குழந்தை பயன்படுத்த முடியாத நேரங்களை அமைக்கிறது.

  • இயல்புநிலை: முடக்கப்பட்டுள்ளது; நேரம் எதுவும் திட்டமிடப்படவில்லை

பெரும்பாலான அமைப்புகளை முடக்கும்போது, தொடர்புடைய அம்சம் உங்கள் பதின்பருவக் குழந்தைக்கு மறைக்கப்படும் அல்லது தடுக்கப்படும். ஓர் அமைப்பை இயக்கும்போது, அந்த அம்சத்தைப் பயன்படுத்த முடியும்; ChatGPT-இன் பிற பாதுகாப்புகள் தொடர்ந்து பொருந்தும். உங்கள் கணக்குகள் இணைக்கப்பட்டிருக்கும்வரை, பெற்றோர் அல்லது பாதுகாவலர் நிர்வகிக்கும் அமைப்புகளை உங்கள் பதின்பருவக் குழந்தையால் மாற்ற முடியாது.

ஸ்டடி மோடு அமைப்பு வேறுவிதமாகச் செயல்படுகிறது: தகுதியுள்ள புதிய உரையாடல்கள் எப்படித் தொடங்குகின்றன என்பதை அது கட்டுப்படுத்துகிறது; ஆனால் ஸ்டடி மோடுக்கான அணுகலைத் தடுக்காது. படிப்பு நேரம் என்பது தனியான அமைப்பு.

சில மாற்றங்கள் உடனடியாகச் செயல்பாட்டுக்கு வராமல் போகலாம். ஓர் அமைப்பு புதிய உரையாடல்களுக்கு மட்டுமே பொருந்தலாம்; ஏற்கெனவே உள்ள உரையாடல்கள் முந்தைய அமைப்புகளுடனேயே தொடரலாம்.

ChatGPT வேலை கட்டுப்பாடுகளும் தனித்தனியாகச் செயல்படுகின்றன. Codex பிணைய அணுகலை முடக்குவது, ChatGPT வேலை இயக்கும் நிரல் இணையச் சேவைகளுடன் இணைவதைத் தடுக்கிறது. இது தேடல், செருகுநிரல்கள், செயலிகள் அல்லது மேகக்கணி உலாவியைக் கட்டுப்படுத்தாது. மேகக்கணி உலாவியை முடக்குவது, ChatGPT வேலை அதன் உள்ளமைந்த மேகக்கணி உலாவியைப் பயன்படுத்துவதைத் தடுக்கிறது.

உரையாடலில் அமைப்புகளைப் புதுப்பிக்கவும்

இணைக்கப்பட்ட பதின்பருவக் கணக்கிற்கான ஆதரிக்கப்படும் பேரென்டல் கண்ட்ரோல்ஸ் அமைப்புகளைப் பார்க்க அல்லது புதுப்பிக்க, பெற்றோரும் பாதுகாவலர்களும் ChatGPT-ஐக் கேட்கலாம்:

1. உங்களுடன் கணக்கு இணைக்கப்பட்டுள்ள பதின்பருவக் குழந்தைக்கான ஓர் அமைப்பை மாற்றும்படி ChatGPT-ஐக் கேட்கவும்.

2. கோரப்பட்ட மாற்றத்தைச் சரிபார்க்கவும்.

3. மாற்றத்தைச் செயல்படுத்த அனுமதிக்கவும் அல்லது தற்போதைய அமைப்பை அப்படியே வைத்திருக்க மறுக்கவும் என்பதைத் தேர்ந்தெடுக்கவும்.

பதின்பருவத்தினர் தங்கள் கணக்கிற்குப் பொருந்தும் கட்டுப்பாடுகள் குறித்து ChatGPT-இடம் கேட்கலாம். ஆனால் பெற்றோர் அல்லது பாதுகாவலர் நிர்வகிக்கும் அமைப்புகளை மாற்ற முடியாது.

சில அமைப்புகளை உரையாடலில் புதுப்பிக்க முடியாது. அந்த அமைப்புகள், அழைப்புகள் அல்லது இணைக்கப்பட்ட கணக்குகளை நிர்வகிக்க, அமைப்புகள் > பேரென்டல் கண்ட்ரோல்ஸ் என்பதற்குச் செல்லவும்.

உணர்வுகளைப் பாதிக்கக்கூடிய உள்ளடக்கத்திற்கான பாதுகாப்புகளை நிர்வகிக்கவும்

பதின்பருவத்தினரின் கணக்கை இணைப்பது, வெளிப்படையான கொடூர உள்ளடக்கம், வேகமாகப் பரவும் சவால்கள், பாலியல் அல்லது காதல் சார்ந்த பாத்திரமேற்று நடிக்கும் உரையாடல்கள், வன்முறை சார்ந்த பாத்திரமேற்று நடிக்கும் உரையாடல்கள் மற்றும் அளவுகடந்த அழகு இலட்சியங்களைக் குறைக்க உதவும் பாதுகாப்புகளைச் சேர்க்கிறது.

பெற்றோர் அல்லது பாதுகாவலரால் உணர்வுகளைப் பாதிக்கக்கூடிய உள்ளடக்கத்தைக் குறைக்கவும் என்ற அமைப்பை முடக்க முடியக்கூடும். இது அந்தக் குறிப்பிட்ட பாதுகாப்பை மட்டுமே மாற்றுகிறது. இது பதின்பருவத்தினரின் கணக்கை வயதுவந்தவரின் கணக்காக மாற்றாது; பதின்பருவத்தினருக்கான பிற பாதுகாப்புகள், அம்ச வரம்புகள் அல்லது பாதுகாப்பு அமைப்புகளையும் அகற்றாது.

மேலும் தகவலுக்கு, இதைப் பார்க்கவும்: ChatGPT-இல் உணர்வுகளைப் பாதிக்கக்கூடிய உள்ளடக்கத்தைக் குறைக்கவும்.

Health-ஐ நிர்வகிக்கவும்

தகுதியுள்ள பதின்பருவத்தினருக்கு Health இயல்பாகவே இயக்கப்பட்டிருக்கும். உங்களுடன் கணக்கு இணைக்கப்பட்டுள்ள பதின்பருவக் குழந்தைக்கு இதை இயக்க அல்லது முடக்க:

1. அமைப்புகள் > பேரென்டல் கண்ட்ரோல்ஸ் என்பதற்குச் செல்லவும்.

2. குடும்ப உறுப்பினர்கள் என்பதன் கீழ் உங்கள் பதின்பருவக் குழந்தையைத் தேர்ந்தெடுக்கவும்.

3. Health-ஐ இயக்கவும் அல்லது முடக்கவும்.

உங்கள் பதின்பருவக் குழந்தை இந்த அமைப்பைப் பார்க்கலாம். ஆனால் உங்கள் கணக்குகள் இணைக்கப்பட்டிருக்கும்வரை, நீங்கள் மட்டுமே இதை மாற்ற முடியும். Health-ஐ இயக்கினால் அதைப் பயன்படுத்த முடியும். இருப்பினும், ஆதரிக்கப்படும் எந்தத் தரவு மூலங்களை இணைப்பது என்பதை உங்கள் பதின்பருவக் குழந்தையே தேர்வுசெய்து, உள்நுழைவு மற்றும் அனுமதி படிகளை நிறைவு செய்ய வேண்டும். சில தரவு மூலங்கள் பதின்பருவத்தினருக்கு அணுகலை வழங்காமல் இருக்கலாம் அல்லது பதின்பருவத்தினருக்கான கணக்கை அமைக்கப் பெற்றோரின் அனுமதியைக் கோரலாம்.

Health-ஐ முடக்கினால், அது உங்கள் பதின்பருவக் குழந்தையின் பக்கப்பட்டி மற்றும் செருகுநிரல் பட்டியலிலிருந்து அகற்றப்படும், Health இணைப்பு துண்டிக்கப்படும், ஒத்திசைக்கப்பட்ட உடல்நலத் தரவு நீக்கப்படும். ஏற்கெனவே உள்ள அரட்டைகள் அப்படியே இருக்கும். நீங்கள் Health-ஐ மீண்டும் இயக்கினால், உங்கள் பதின்பருவக் குழந்தை Health மற்றும் தனது தரவு மூலங்களை மீண்டும் இணைக்க வேண்டும். முந்தைய இணைப்புகளும் ஒத்திசைக்கப்பட்ட தரவும் தானாக மீட்டமைக்கப்படாது.

இந்த அமைப்பு Health மற்றும் இணைக்கப்பட்ட உடல்நலத் தரவுக்கான அணுகலைக் கட்டுப்படுத்துகிறது. ChatGPT-இல் பொதுவான உடல்நலக் கேள்விகளைக் கேட்பதிலிருந்து உங்கள் பதின்பருவக் குழந்தையை இது தடுக்காது. பேரென்டல் கண்ட்ரோல்ஸ் மூலம் உங்கள் பதின்பருவக் குழந்தையின் Health உரையாடல்கள் அல்லது இணைக்கப்பட்ட உடல்நலத் தரவுக்கான அணுகல் உங்களுக்குக் கிடைக்காது.

படிப்பு நேரத்தை அமைக்கவும்

படிப்பு நேரம் என்பது விருப்பத்திற்குரிய அமைப்பு; இது இயல்பாகவே முடக்கப்பட்டிருக்கும். இது இயக்கப்பட்டிருக்கும்போது, திட்டமிட்ட நேரங்களில் முதன்மை ChatGPT அனுபவத்தில் தகுதியுள்ள புதிய உரையாடல்கள் ஸ்டடி மோடில் தொடங்கும்.

படிப்பு நேரம் ChatGPT-க்கான அணுகலைக் கட்டுப்படுத்தாது; GPT அல்லது திட்ட உரையாடல்களுக்கும் பொருந்தாது. இது ஓய்வு நேரம் என்பதிலிருந்து வேறுபட்டது; இதை அமைப்புகள் > பேரென்டல் கண்ட்ரோல்ஸ் என்பதில் நிர்வகிக்க வேண்டும். இதை உரையாடலில் மாற்ற முடியாது.

மேலும் தகவலுக்கு, இதைப் பார்க்கவும்: ChatGPT-இல் ஸ்டடி மோடைப் பயன்படுத்துதல்.

ஓய்வு நேரத்தை அமைக்கவும்

ChatGPT வேலை உட்பட ChatGPT-ஐ உங்கள் பதின்பருவக் குழந்தை பயன்படுத்த முடியாத நேரங்களை ஓய்வு நேரம் மூலம் திட்டமிடலாம்:

1. அமைப்புகள் > பேரென்டல் கண்ட்ரோல்ஸ் என்பதற்குச் செல்லவும்.

2. குடும்ப உறுப்பினர்கள் என்பதன் கீழ் உங்கள் பதின்பருவக் குழந்தையைத் தேர்ந்தெடுக்கவும்.

3. ஓய்வு நேரம் என்பதை இயக்கவும்.

4. தொடக்க நேரத்தையும் முடிவு நேரத்தையும் தேர்ந்தெடுக்கவும்.

ஒன்றுக்கும் மேற்பட்ட நேர இடைவெளிகளைச் சேர்க்கலாம். ஓய்வு நேரத்தை அமைப்புகள் > பேரென்டல் கண்ட்ரோல்ஸ் என்பதில் நிர்வகிக்க வேண்டும்; உரையாடலில் அதை மாற்ற முடியாது.

பாதுகாப்பு அறிவிப்புகள்

உங்கள் கணக்குகள் இணைக்கப்பட்டிருக்கும்போது, உங்கள் பதின்பருவக் குழந்தையின் பாதுகாப்பு குறித்த தீவிரக் கவலை எழும் சில குறிப்பிட்ட சூழல்களில் ChatGPT உங்களுக்கு அறிவிக்கக்கூடும்.

பின்வரும் சூழல்களில் அறிவிப்புகள் அனுப்பப்படலாம்:

• சிறப்புப் பயிற்சி பெற்ற மதிப்பாய்வாளர்கள், சுயதீங்கு குறித்த தீவிரக் கவலையைக் கண்டறியும்போது.

• சிறப்புப் பயிற்சி பெற்ற மதிப்பாய்வாளர்கள், சீரற்ற உணவுப் பழக்கங்களுடன் தொடர்புடையதாகவும் உடல்நலப் பிரச்சினையைக் குறிப்பதாகவும் இருக்கக்கூடிய நடத்தைகளைக் கண்டறியும்போது. சீரற்ற உணவுப் பழக்கங்கள் குறித்த அறிவிப்புகள் அரட்டையில் நடைபெறும் உரையாடல்களுக்கு மட்டுமே பொருந்தும்; வேலை அல்லது Codex-இல் இவை கிடைக்காது.

• வன்முறைச் செயல்கள் தொடர்பான உரையாடல்களுக்காக, OpenAI-இன் பயன்பாட்டுக் கொள்கைகளின்படி உங்கள் பதின்பருவக் குழந்தையின் கணக்கு நிரந்தரமாக மூடப்படும்போது.

பாதுகாப்பு அறிவிப்புகள் என்பது நிகழ்நேரக் கண்காணிப்பு அல்ல. அவை எல்லாப் பிரச்சினைகளையும் கண்டறியாமல் போகலாம்; தொழில்முறைப் பராமரிப்பு அல்லது அவசரகாலச் சேவைகளுக்கு அவை மாற்றாகாது.

யாரேனும் உடனடி ஆபத்தில் இருக்கக்கூடும் என்றால், உள்ளூர் அவசரகாலச் சேவைகளைத் தொடர்புகொள்ளவும்.

அறிவிப்பு மதிப்பாய்வு

பாதுகாப்பு அறிவிப்பு அனுப்பப்படுவதற்கு முன், சிறப்புப் பயிற்சி பெற்ற மதிப்பாய்வாளர்கள் சுயதீங்கு மற்றும் சீரற்ற உணவுப் பழக்கங்கள் தொடர்பான தீவிரக் கவலைகளை மதிப்பிடுகின்றனர்.

வன்முறை தொடர்பான பாதுகாப்பு அறிவிப்புகளுக்கான மதிப்பாய்வு நடைமுறை, தீவிரமான சுயதீங்கு அல்லது சீரற்ற உணவுப் பழக்கங்கள் குறித்த அறிவிப்புகளுக்கான நடைமுறையிலிருந்து வேறுபடலாம்.

கணக்குகளைச் செயலிழக்கச் செய்வதற்கான மதிப்பாய்வு நடைமுறைகள் வேறுபடலாம்.

அறிவிப்பில் இடம்பெறும் தகவல்கள்

பாதுகாப்பு அறிவிப்பில் பின்வருபவை இடம்பெறலாம்:

• பாதுகாப்பு குறித்த கவலை எந்த வகையைச் சேர்ந்தது என்பதன் சுருக்கமான விளக்கம்.

• பொருந்தும் சூழலில், கணக்கு நிரந்தரமாக மூடப்பட்டது குறித்த தகவல்.

• பொருந்தும் சூழலில், உரையாடல் முடிக்கப்பட்டதா அல்லது உங்கள் பதின்பருவக் குழந்தையின் கணக்கு தற்காலிகமாக இடைநிறுத்தப்பட்டதா என்பது.

• கிடைக்கும்போது, தொடர்புடைய உதவி வளங்கள் அல்லது OpenAI ஆதரவுக் குழுவைத் தொடர்புகொள்வது பற்றிய தகவல்.

அறிவிப்பில் உங்கள் பதின்பருவக் குழந்தையின் உரையாடல், அரட்டை உரைப்பதிவு அல்லது அரட்டை வரலாறு இடம்பெறாது. பேரென்டல் கண்ட்ரோல்ஸ் மூலம் பெற்றோர் அல்லது பாதுகாவலரால் பதின்பருவத்தினரின் உரையாடல்களைப் படிக்கவோ கண்காணிக்கவோ முடியாது.

அறிவிப்பு விருப்பங்களை நிர்வகிக்கவும்

பெற்றோர் அல்லது பாதுகாவலரும் பதின்பருவத்தினரும் தங்கள் கணக்குகளை இணைக்கும்போது, பாதுகாப்பு அறிவிப்புகள் இயல்பாகவே இயக்கப்படும். கணக்குகளை இணைத்த பிறகு, பாதுகாப்பு அறிவிப்புகளை அனுப்பத் தொடங்க சில மணிநேரங்கள் வரை ஆகலாம்.

கிடைக்கும் தொடர்பு விருப்பங்களைப் பார்க்க, பாதுகாப்பு அறிவிப்புகள் என்பதன் கீழ் அறிவிப்புகளை நிர்வகிக்கவும் என்பதைத் தேர்ந்தெடுக்கவும். கிடைக்கும் உங்கள் தொடர்புத் தகவல் மற்றும் அறிவிப்பு அமைப்புகளைப் பொறுத்து, மின்னஞ்சல், குறுஞ்செய்தி அல்லது உடனடி அறிவிப்பு மூலம் அறிவிப்புகள் வரலாம்.

அறிவிப்பு விருப்பங்களை மாற்றுவதால், உங்கள் பதின்பருவக் குழந்தையின் உரையாடல்களுக்கான அணுகல் உங்களுக்குக் கிடைக்காது. உங்கள் கணக்குகளின் இணைப்பு நீக்கப்பட்டால், அந்தக் கணக்கிற்கான பதின்பருவப் பாதுகாப்பு அறிவிப்புகள் நிறுத்தப்படும்.

பாதுகாப்பு அறிவிப்பு வந்தால் செயல்பட வேண்டிய விதம்

உங்கள் பதின்பருவக் குழந்தையிடம் நலம் விசாரிக்கவும். அவர்கள் இப்போது பாதுகாப்பாக இருக்கிறார்களா என்று கேளுங்கள். குறைகூறாமல் அவர்கள் சொல்வதைக் கேட்டு, அவர்கள் நம்பும் ஒருவர், தகுதிபெற்ற நிபுணர் அல்லது நெருக்கடிக்கால உதவி எண்ணைத் தொடர்புகொள்ள உதவுங்கள்.

உங்கள் பதின்பருவக் குழந்தை தனக்கோ வேறொருவருக்கோ தீங்கு விளைவிக்கக்கூடும் என நீங்கள் கருதினால், அல்லது யாரேனும் உடனடி ஆபத்தில் இருந்தால், உள்ளூர் அவசரகாலச் சேவைகளைத் தொடர்புகொள்ளவும்.

பல்வேறு நாடுகள் மற்றும் பிராந்தியங்களில் நெருக்கடிக்கால உதவியைக் கண்டறிய, இதைப் பார்க்கவும்: உதவி எண்ணைக் கண்டறியவும்.

ஓர் அறிவிப்பு குறித்துக் கேள்விகள் இருந்தால், அதில் உள்ள தொடர்பு வழிமுறைகளைப் பின்பற்றவும் அல்லது ஹெல்ப் சென்டர் மூலம் OpenAI ஆதரவுக் குழுவைத் தொடர்புகொள்ளவும். உங்கள் பதின்பருவக் குழந்தையின் அரட்டை உரைப்பதிவுக்கான அணுகலை ஆதரவுக் குழுவால் வழங்க முடியாது.

உங்கள் கணக்குகளின் இணைப்பை நீக்கவும்

பதின்பருவத்தினர் அல்லது இணைக்கப்பட்ட பெற்றோர் அல்லது பாதுகாவலர் எப்போது வேண்டுமானாலும் கணக்குகளின் இணைப்பை நீக்கவும் என்பதைத் தேர்ந்தெடுக்கலாம்.

பதின்பருவத்தினர் தனது கணக்கின் இணைப்பை நீக்கினால், பெற்றோர் அல்லது பாதுகாவலருக்கு அறிவிக்கப்படும். கணக்குகளின் இணைப்பு நீக்கப்பட்ட பிறகு, பெற்றோர் அல்லது பாதுகாவலரால் பதின்பருவத்தினரின் அமைப்புகளை நிர்வகிக்கவோ அந்தக் கணக்கிற்கான பாதுகாப்பு அறிவிப்புகளைப் பெறவோ முடியாது.

பேரென்டல் கண்ட்ரோல்ஸ் மூலம் Health முடக்கப்பட்டிருந்தால், கணக்குகளின் இணைப்பை நீக்குவது அந்தக் கட்டுப்பாட்டை அகற்றும். பிற தகுதிகளைப் பூர்த்தி செய்தால் உங்கள் பதின்பருவக் குழந்தை Health-ஐப் பயன்படுத்தலாம். ஆனால் Health மற்றும் தங்கள் தரவு மூலங்களை மீண்டும் இணைக்க வேண்டும். முன்பு இணைப்பு துண்டிக்கப்பட்ட தரவு தானாக மீட்டமைக்கப்படாது.

பதின்பருவத்தினருக்கு 18 வயதாகும்போது

இணைக்கப்பட்ட பதின்பருவக் கணக்கு 18 வயது அல்லது அதற்கு மேற்பட்ட ஒருவருக்குச் சொந்தமானது என ChatGPT கண்டறியும்போது, அந்தக் கணக்கு பதின்பருவத்தினருக்கான ChatGPT அனுபவத்திலிருந்து வெளியேறும்.

அப்போது:

அடிக்கடி கேட்கப்படும் கேள்விகள்

பதின்ம வயதினரின் உரையாடல்களைப் பெற்றோர் அல்லது பாதுகாவலர்கள் படிக்க முடியுமா?

முடியாது. பேரென்டல் கண்ட்ரோல்ஸ் மூலம் பதின்ம வயதினரின் உரையாடல்கள், அரட்டை வரலாறு அல்லது நிகழ்நேரச் செயல்பாடுகளை அணுக முடியாது.

பாதுகாப்பு அறிவிப்புகளில், கவலை குறித்தும் அது தொடர்பாகக் கணக்கில் எடுக்கப்பட்ட நடவடிக்கை குறித்தும் வரையறுக்கப்பட்ட தகவல்கள் இடம்பெறும். அவற்றில் உரையாடல் பதிவுகள் இடம்பெறாது.

பதின்ம வயதினர் பேரென்டல் கண்ட்ரோல்ஸ் இணைப்பை நீக்க முடியுமா?

ஆம். பதின்ம வயதினர் அல்லது இணைக்கப்பட்ட பெற்றோர் அல்லது பாதுகாவலர் என எவர் வேண்டுமானாலும் கணக்குகளின் இணைப்பை நீக்கலாம். பதின்ம வயதினர் தமது கணக்கின் இணைப்பை நீக்கினால், பெற்றோர் அல்லது பாதுகாவலருக்கு அறிவிக்கப்படும்.

பதின்பருவத்தினருக்கு 18 வயதாகும்போது பேரென்டல் கண்ட்ரோல்ஸ் என்னவாகும்?

பதின்பருவத்தினரின் கணக்கு, பதின்பருவத்தினருக்கான ChatGPT அனுபவத்திலிருந்து வெளியேறும்போது, பேரென்டல் கண்ட்ரோல்ஸ் அகற்றப்படும், கணக்குகளுக்கிடையேயான இணைப்பு துண்டிக்கப்படும், பதின்பருவத்தினரின் பாதுகாப்பு அறிவிப்புகளும் நிறுத்தப்படும்.

கணக்கு வைத்திருப்பவர் தனது ChatGPT அமைப்புகளின் மீது முழுக் கட்டுப்பாட்டைப் பெறுவார். பதின்பருவத்தினருக்கான பாதுகாப்புகள் முடக்கப்படும்; பிற அமைப்புகள் தானாக மாறாது.

எனக்கு 18 வயது அல்லது அதற்கு மேல் இருந்தும் பதின்பருவப் பாதுகாப்புகள் தொடர்ந்தால் என்ன செய்வது?

உங்களுக்கு 18 வயது அல்லது அதற்கு மேல் இருந்து, தவறுதலாகப் பதின்பருவத்தினருக்கான அனுபவத்தில் சேர்க்கப்பட்டிருந்தால், உங்கள் வயதைச் சரிபார்க்கலாம்.

இணையதளத்தில், அமைப்புகள் > கணக்கு என்பதற்குச் சென்று, வயதைச் சரிபார்க்கவும் என்பதைத் தேர்ந்தெடுக்கவும். ChatGPT-இல் உள்நுழைந்த நிலையில் வயது சரிபார்ப்புப் பக்கத்தையும் திறக்கலாம்.

உங்களுக்கு 18 வயது அல்லது அதற்கு மேல் இருப்பது சரிபார்ப்பில் உறுதியான பிறகு, கணக்கு புதுப்பிக்கப்பட 1 மணிநேரம் வரை காத்திருந்து, பின்னர் ChatGPT-ஐ மீளேற்றவும். சரிபார்ப்பைத் தொடங்க முடியவில்லை என்றாலோ, செயல்முறை மீண்டும் மீண்டும் தோல்வியடைந்தாலோ, குறிப்பிட்ட நேரத்திற்குப் பிறகும் பதின்பருவப் பாதுகாப்புகள் தொடர்ந்தாலோ, ஹெல்ப் சென்டர் வழியாக OpenAI ஆதரவுக் குழுவைத் தொடர்புகொள்ளவும்.

மேலும் அறிய, ChatGPT-இல் வயதைக் கணித்தல் என்பதைப் பார்க்கவும்.

பதின்ம வயதினருக்கான அனுபவம் முடிந்த பிறகு பேரென்டல் கண்ட்ரோல்ஸை மீண்டும் இணைக்க முடியுமா?

பெற்றோர் அல்லது பாதுகாவலரால் மற்றொரு அழைப்பை அனுப்ப முடியும். ஆனால் கணக்குகளை மீண்டும் இணைப்பதற்கு முன் கணக்கு வைத்திருப்பவர் அதை ஏற்க வேண்டும்.

ஒரு கணக்கு பதின்ம வயதினருக்கான ChatGPT அனுபவத்திலிருந்து முன்கூட்டியே வெளியேறியிருந்தால், கணக்கு வைத்திருப்பவர் ChatGPT-இல் வயதுச் சரிபார்ப்பைப் பயன்படுத்தலாம். மேலும் அறிய: ChatGPT பயனருக்கு 18 வயதாகும்போது என்ன மாறும் என்பதைப் பார்க்கவும்.

தகுதியுள்ள பெரியவர்கள் தனியான பாதுகாப்பு அம்சமான நம்பகமான தொடர்பையும் பயன்படுத்தலாம்.

பேரென்டல் கண்ட்ரோல்ஸ் மற்றும் நம்பகமான தொடர்பு எவ்வாறு வேறுபடுகின்றன?

பேரென்டல் கண்ட்ரோல்ஸ் என்பது பதின்ம வயதினருக்கும் அவர்களுடன் இணைக்கப்பட்ட பெற்றோர் அல்லது பாதுகாவலருக்கும் உரியது. தேர்ந்தெடுக்கப்பட்ட ChatGPT அமைப்புகளை நிர்வகிக்கவும், குறிப்பிட்ட சில சூழல்களில் பாதுகாப்பு அறிவிப்புகளைப் பெறவும் அவை பெற்றோர் அல்லது பாதுகாவலரை அனுமதிக்கின்றன.

நம்பகமான தொடர்பு என்பது 18 அல்லது அதற்கு மேற்பட்ட வயதுடைய பெரியவர்களுக்கான தனியான, விருப்பத்திற்குரிய அம்சமாகும். கொரியாவில் குறைந்தபட்ச வயது 19. தற்கொலை தொடர்பான தீவிரப் பாதுகாப்புக் கவலையை ChatGPT கண்டறிந்தால், தகுதியுள்ள பெரியவர் அறிவிப்பைப் பெறக்கூடிய ஒருவரைத் தேர்வுசெய்ய இந்த அம்சம் உதவுகிறது.