குறிப்பு: இந்தச் சலுகைக்குப் பயன்படுத்த விரும்பும் ChatGPT கணக்கில் உள்நுழைந்திருப்பதை உறுதிசெய்யவும். SheerID மூலம் நீங்கள் சரிபார்க்கும் மின்னஞ்சல் முகவரி தகுதிபெற்ற கல்வி நிறுவனத்துடன் இணைக்கப்பட்ட மின்னஞ்சல் முகவரியாக இருக்க வேண்டும். மேலும், அந்த ChatGPT கணக்கில் உள்ள மின்னஞ்சல் முகவரியுடன் அது பொருந்த வேண்டும். முகவரிகள் பொருந்தவில்லை என்றால், சரிபார்ப்பு தோல்வியடையும். தேவைப்பட்டால், சரிபார்ப்பைத் தொடங்குவதற்கு முன் வெளியேறி, உங்கள் கல்வி நிறுவனத்துடன் இணைக்கப்பட்ட ChatGPT கணக்கில் மீண்டும் உள்நுழையவும் அல்லது அந்த மின்னஞ்சல் முகவரியைப் பயன்படுத்தி ஒரு கணக்கை உருவாக்கவும்.
மின்னஞ்சல் முகவரி பொருந்தாததால் சரிபார்ப்பு தோல்வியடைந்திருந்தால், இந்தச் சலுகைக்குப் பயன்படுத்த விரும்பும் ChatGPT கணக்கில் உள்நுழைந்து, SheerID சரிபார்ப்பை மீண்டும் தொடங்குவதற்கு முன் நீங்கள் உள்நுழைந்திருப்பதை உறுதிசெய்த பிறகு மீண்டும் சரிபார்க்க முயலலாம்.
கண்ணோட்டம்
கல்விசார் ஆராய்ச்சியாளர்களுக்கான ChatGPT என்பது தகுதியுள்ள கல்விசார் ஆராய்ச்சிக் குழுக்களுக்கான கட்டணமில்லா கணக்குத் திட்டமாகும். தகுதியுள்ள கல்வி நிறுவனத்துடன் தொடர்புடைய ஆராய்ச்சியாளராகவோ ஆசிரியராகவோ இருந்தால், அணுகலுக்கு விண்ணப்பிக்கலாம். அங்கீகரிக்கப்பட்டால், ChatGPT வர்க்ஸ்பேஸை உருவாக்கி நிர்வகிக்கலாம். அங்கீகரிக்கப்பட்ட ஒவ்வொரு வர்க்ஸ்பேஸிலும் அதிகபட்சம் ஐந்து கட்டணமில்லா பயனர் இடங்கள் உள்ளன: ஒரு வர்க்ஸ்பேஸ் உரிமையாளர் மற்றும் அதிகபட்சம் நான்கு சரிபார்க்கப்பட்ட கூட்டுப்பணியாளர்கள். வணிகத் தரவுப் பாதுகாப்புகளும் வர்க்ஸ்பேஸ் கட்டுப்பாடுகளும் இதில் அடங்கும்.
பின்வரும் நிபந்தனைகளைப் பூர்த்திசெய்தால், நீங்கள் விண்ணப்பிக்கத் தகுதிபெறலாம்:
தகுதியுள்ள கல்வி நிறுவனத்துடன் தொடர்புடைய ஆராய்ச்சிப் பேராசிரியராகவோ முனைவர் பட்டத்திற்குப் பிந்தைய ஆராய்ச்சியாளராகவோ இருத்தல்
கடந்த மூன்று ஆண்டுகளுக்குள் arXiv, bioRxiv அல்லது ChemRxiv-இல் வெளியிடப்பட்டதும், தகுதியுள்ள உங்கள் ஆராய்ச்சித் துறையுடன் தொடர்புடையதும், உங்களை ஆசிரியராகக் குறிப்பிடுவதுமான ஆய்வுக் கட்டுரை இருத்தல். தகுதியுள்ள துறைகள்: உயிரியல் அறிவியல், வேதியியல் மற்றும் பொருள்கள், கணினி அறிவியல், புவி மற்றும் கோள் அறிவியல், பொறியியல், கணிதம் அல்லது இயற்பியல்
கல்விசார் ஆராய்ச்சி நோக்கங்களுக்காக ChatGPT-ஐப் பயன்படுத்தத் திட்டமிட்டிருத்தல்.
தகுதியுள்ள நிறுவனங்களுடன் தொடர்புடைய, ஆதரிக்கப்படும் நாடுகளில் உள்ள ஆராய்ச்சியாளர்கள் மட்டுமே விண்ணப்பிக்க முடியும். வர்க்ஸ்பேஸ் உரிமையாளர்கள் மற்றும் கூட்டுப்பணியாளர்கள் ஆகிய இரு தரப்பினரும் சரிபார்க்கப்பட்டு, தகுதிச் சோதனைகளில் தேர்ச்சிபெற வேண்டும். எல்லா நிறுவனங்களும் தகுதியுடையவை அல்ல. விண்ணப்பிப்பதற்கு முன் தற்போதைய தகுதிப் பட்டியலைப் பார்க்கவும்.
பல்கலைக்கழகத்துடன் தொடர்புடைய ஆராய்ச்சியாளர்கள், அந்தப் பல்கலைக்கழகத்துடனான தங்கள் உறவுக்குப் பொருந்தும் அனைத்து விதிமுறைகளையும் கட்டுப்பாடுகளையும் பின்பற்றுவதற்குப் பொறுப்பானவர்கள்.
தொடங்குவது எப்படி
கல்விசார் ஆராய்ச்சியாளர்களுக்கான ChatGPT விண்ணப்பப் பக்கத்திற்குச் செல்லவும். உங்கள் கல்வி நிறுவனத்தில் பயன்படுத்தும் மின்னஞ்சல் முகவரியைக் கொண்டு உள்நுழையவும் அல்லது ChatGPT கணக்கை உருவாக்கவும். உங்கள் ChatGPT கணக்கின் மின்னஞ்சல் முகவரியும் சரிபார்ப்புக்குப் பயன்படுத்தும் மின்னஞ்சல் முகவரியும் ஒன்றாக இருக்க வேண்டும்.
மூன்றாம் தரப்பு சரிபார்ப்புச் சேவையான SheerID மூலம் உங்கள் நிறுவனத் தொடர்பைச் சரிபார்க்கவும். உங்கள் நிறுவனத் தொடர்பைத் தானாகச் சரிபார்க்க முடியாவிட்டால், பணி அல்லது பல்கலைக்கழக ஆவணங்களை SheerID கேட்கலாம். நீங்கள் VPN பயன்படுத்தவில்லை என்பதை உறுதிசெய்யவும்.
சுருக்கமான விண்ணப்பத்தைப் பூர்த்திசெய்யவும். உங்கள் துறை, வெளியிடப்பட்ட அல்லது தொடர்புடைய பணி, கல்விசார் ஆராய்ச்சிக்கு ChatGPT-ஐ எவ்வாறு பயன்படுத்தத் திட்டமிட்டுள்ளீர்கள் ஆகியவை குறித்து உங்களிடம் கேட்கப்படும்.
OpenAI உங்கள் விண்ணப்பத்தை மதிப்பாய்வு செய்யும். தேர்ந்தெடுக்கப்பட்டால், வர்க்ஸ்பேஸை அமைப்பதற்கான வழிமுறைகளைப் பெறுவீர்கள். பொதுவாக மதிப்பாய்வுக்கு 1–2 வாரங்கள் ஆகலாம்.
சரிபார்ப்புக்கு மட்டுமே தேவைப்படும் செல்லுபடியாகும் கடன் அட்டையைப் பயன்படுத்தி கட்டணச் செயல்முறையை நிறைவுசெய்யவும். கட்டணமில்லா காலத்திற்கான மொத்தத் தொகை $0 என்பதால், உங்களிடம் கட்டணம் வசூலிக்கப்படாது.
உங்கள் வர்க்ஸ்பேஸை உருவாக்கவும். அதே நிறுவனத்தைச் சேர்ந்த அதிகபட்சம் நான்கு கூட்டுப்பணியாளர்களை வர்க்ஸ்பேஸ் உரிமையாளர் அழைக்கலாம். ஒவ்வொரு கூட்டுப்பணியாளரும் இணைவதற்கு முன் SheerID சரிபார்ப்பைப் பூர்த்திசெய்ய வேண்டும்.
சரிபார்க்கப்பட்ட மின்னஞ்சல் முகவரி, ஒரே நேரத்தில் கல்விசார் ஆராய்ச்சியாளர்களுக்கான ஒரே ஒரு ChatGPT வர்க்ஸ்பேஸில் மட்டுமே இடம்பெற முடியும்.
தரவுத் தனியுரிமையும் பாதுகாப்பும்
உங்கள் தரவு பயன்படுத்தப்படும் விதம்
கல்விசார் ஆராய்ச்சியாளர்களுக்கான ChatGPT, வணிக நிலைத் தரவுப் பாதுகாப்புகளைப் பயன்படுத்துகிறது. இயல்புநிலையில், இந்த வர்க்ஸ்பேஸின் உள்ளடக்கம் OpenAI நிறுவனத்தின் மாடல்களுக்குப் பயிற்சியளிக்கப் பயன்படுத்தப்படாது. வர்க்ஸ்பேஸ் நிர்வாகிகள் அதன் தரவை நிர்வகிக்கிறார்கள். அந்தத் தரவைப் பார்ப்பது, அணுகுவது, ஏற்றுமதி செய்வது, தணிக்கை செய்வது, தக்கவைப்பது, நீக்குவது ஆகியவையும், OpenAI நிறுவனத்தின் மாடல்களை மேம்படுத்த இந்த வர்க்ஸ்பேஸுடன் தொடர்புடைய தரவைப் பகிர்வதைத் தேர்வுசெய்வதும் இதில் அடங்கும். உங்கள் தனிப்பட்ட ChatGPT வர்க்ஸ்பேஸ் தனியாகவே இருக்கும்; அதை நீங்களே நிர்வகிப்பீர்கள். அது OpenAI நிறுவனத்தின் டெர்ம்ஸ் ஆஃப் யூஸ் மற்றும் பிரைவசி பாலிசி ஆகியவற்றால் நிர்வகிக்கப்படுகிறது. மேலும் அறிய, நிர்வகிக்கப்படும் உங்கள் ChatGPT கணக்கிற்கான தரவு அணுகல் மற்றும் OpenAI நிறுவனத்தின் நிறுவனத் தனியுரிமை ஆகியவற்றைப் பார்க்கவும்.
அடிக்கடி கேட்கப்படும் கேள்விகள்
இது இலவசமா?
ஆம். அங்கீகரிக்கப்பட்ட வர்க்ஸ்பேஸ்களுக்கு 12 மாதங்களுக்கு அதிகபட்சம் ஐந்து கட்டணமில்லா பயனர் இடங்கள் கிடைக்கும். வர்க்ஸ்பேஸ் உரிமையாளர் கட்டணச் செயல்முறையை நிறைவுசெய்யும்போது கட்டண அட்டை தேவைப்படும். ஆனால் கட்டணமில்லா காலத்திற்கான மொத்தத் தொகை $0.
12 மாதங்களுக்குப் பிறகு என்ன நடக்கும்?
12 மாதச் சலுகைக்காக உங்களிடம் கட்டணம் வசூலிக்கப்படாது. வர்க்ஸ்பேஸும் தானாகப் புதுப்பிக்கப்படாது. சலுகை முடிவதற்கு முன், தொடர்வதற்கான விருப்பங்கள் ஏதேனும் இருந்தால் அவற்றை OpenAI பகிரும். தொடர்வதற்கான எந்த விருப்பமும் தேர்ந்தெடுக்கப்படாவிட்டால், பொருந்தக்கூடிய அவகாசக் காலத்திற்குப் பிறகு வர்க்ஸ்பேஸ் செயலிழக்கச் செய்யப்படும். வர்க்ஸ்பேஸ் ரத்துசெய்யப்பட்டால், வழக்கமான வர்க்ஸ்பேஸ் ரத்துசெய்தல் நடைமுறை பின்பற்றப்படும்.
இந்தத் திட்டத்திற்குத் தகுதிபெறுபவர்கள் யார்?
பரிசீலிக்கப்படுவதற்கு, ஆதரிக்கப்படும் நாட்டில் உள்ள தகுதியான நிறுவனத்தின் தற்போதைய ஆராய்ச்சிப் பேராசிரியராகவோ முனைவர் பட்டத்திற்குப் பிந்தைய ஆராய்ச்சியாளராகவோ நீங்கள் இருக்க வேண்டும். உங்கள் ChatGPT கணக்கின் அதே மின்னஞ்சல் முகவரியைப் பயன்படுத்தி SheerID மூலம் நிறுவனத் தொடர்பைச் சரிபார்க்க வேண்டும். கடந்த மூன்று ஆண்டுகளுக்குள் arXiv, bioRxiv அல்லது ChemRxiv-இல் வெளியிடப்பட்டதும், நீங்கள் தேர்ந்தெடுத்த தகுதியான ஆராய்ச்சித் துறையுடன் தொடர்புடையதும், உங்களை ஆசிரியராகக் குறிப்பிடுவதுமான ஆய்வுக் கட்டுரையைச் சமர்ப்பிக்க வேண்டும். மேலும், கல்விசார் ஆராய்ச்சிக்கு ChatGPT-ஐ எவ்வாறு பயன்படுத்தத் திட்டமிட்டுள்ளீர்கள் என்பதையும் விவரிக்க வேண்டும்.
இந்தத் தகுதிகளைப் பூர்த்திசெய்வது விண்ணப்பிக்க உங்களை அனுமதிக்கும். ஆனால் அங்கீகாரத்திற்கு உத்தரவாதம் அளிக்காது. விண்ணப்பிப்பதற்கு முன் தற்போதைய நிறுவனத் தகுதிப் பட்டியலைப் பார்க்கவும்.
வேறொரு நிறுவனத்தைச் சேர்ந்த கூட்டுப்பணியாளர்களைச் சேர்க்க முடியுமா?
இல்லை. ஒரு வர்க்ஸ்பேஸில், அதே நிறுவனத்தைச் சேர்ந்த சரிபார்க்கப்பட்ட கூட்டுப்பணியாளர்கள் மட்டுமே இடம்பெற முடியும். உரிமையாளர்கள் கூடுதலாக நான்கு உறுப்பினர்கள் வரை அழைக்கலாம். அழைக்கப்படும் ஒவ்வொருவரும் இணைவதற்கு முன் SheerID சரிபார்ப்பைப் பூர்த்திசெய்ய வேண்டும்.
கல்விசார் ஆராய்ச்சியாளர்களுக்கான ஒன்றுக்கும் மேற்பட்ட ChatGPT வர்க்ஸ்பேஸ்களில் இணைய முடியுமா?
இல்லை. சரிபார்க்கப்பட்ட மின்னஞ்சல் முகவரி, ஒரே நேரத்தில் கல்விசார் ஆராய்ச்சியாளர்களுக்கான ஒரே ஒரு ChatGPT வர்க்ஸ்பேஸில் மட்டுமே இடம்பெற முடியும். ஒரு வர்க்ஸ்பேஸிலிருந்து நீக்கப்பட்ட பிறகு, தகுதியுள்ள மற்றொரு வர்க்ஸ்பேஸில் நீங்கள் இணையலாம்.
என்னென்ன அம்சங்களும் பயன்பாட்டு வரம்புகளும் இதில் உள்ளன?
சுயசேவை ஆராய்ச்சியாளர் வர்க்ஸ்பேஸ், ChatGPT Pro-இன் அதே பயன்பாட்டு விகித வரம்புகளுடன் ஆதரிக்கப்படும் ChatGPT மாடல்களையும் கருவிகளையும் பயன்படுத்தும் அணுகலை வழங்குகிறது. இந்த வரம்புகள் வரம்பற்றவை அல்ல. மாடல்கள் மற்றும் அம்சங்களின் கிடைக்கும் தன்மையும், மாடல் சார்ந்த வரம்புகளும் மாறுபடலாம்; காலப்போக்கில் மாற்றமடையலாம்.
இது வழக்கமான ChatGPT கணக்கிலிருந்து எவ்வாறு வேறுபடுகிறது?
கல்விசார் ஆராய்ச்சியாளர்களுக்கான ChatGPT, சரிபார்க்கப்பட்ட ஆராய்ச்சிக் குழுவுக்கென தனி வர்க்ஸ்பேஸை உருவாக்குகிறது. இது உங்கள் தனிப்பட்ட ChatGPT வர்க்ஸ்பேஸை மேம்படுத்தவோ மாற்றீடு செய்யவோ இல்லை. ஆராய்ச்சியாளர் வர்க்ஸ்பேஸில் வணிக நிலைத் தரவுப் பாதுகாப்புகள், Pro நிலை விகித வரம்புகள் மற்றும் 12 மாதங்களுக்கு அதிகபட்சம் ஐந்து கட்டணமில்லா பயனர் இடங்கள் அடங்கும்.
எனது நிறுவனம் மூலம் ஏற்கெனவே ChatGPT Edu-ஐப் பயன்படுத்தினால் என்ன செய்வது?
உங்கள் கணக்கு ஏற்கெனவே செயலில் உள்ள ChatGPT Edu அல்லது நிறுவன வர்க்ஸ்பேஸில் இடம்பெற்றிருந்தாலும், நீங்கள் விண்ணப்பிக்க வேண்டும். அங்கீகரிக்கப்பட்டால், நிறுவனத்தால் நிர்வகிக்கப்படும் நடைமுறை மூலம் உங்கள் கணக்கு கையாளப்படும். உங்கள் நிறுவனத்தின் விரிவான ChatGPT Edu அமைப்பிற்குள் உங்கள் ஆராய்ச்சியாளர் வர்க்ஸ்பேஸ் அமைக்கப்படும். நீங்கள் அங்கீகரிக்கப்பட்டால், குறிப்பிட்ட வழிமுறைகளுடன் உங்களைத் தொடர்புகொள்வோம்.
கூடுதல் கிரெடிட்களை வாங்க முடியுமா?
ஆம். சேர்க்கப்பட்ட ஒதுக்கீடு பயன்படுத்தப்பட்ட பிறகு, ஆதரிக்கப்படும் அளவிடப்பட்ட அம்சங்களுக்கான கூடுதல் கிரெடிட்களை சுயசேவை ஆராய்ச்சியாளர் வர்க்ஸ்பேஸின் உரிமையாளர் வாங்கலாம். கிரெடிட்கள் ChatGPT பயன்பாட்டை வரம்பற்றதாக ஆக்காது; மாடல் சார்ந்த அனைத்து விகித வரம்புகளையும் மீறவும் அனுமதிக்காது. Edu வர்க்ஸ்பேஸ்களில், கிரெடிட் வாங்குதலும் ஒதுக்கீடும் OpenAI உடனான ஒப்பந்தத்தின்படி நிறுவனத்தால் நிர்வகிக்கப்படுகின்றன.
திட்டத்தில் வேறு கட்டுப்பாடுகள் உள்ளனவா?
ஆம். சுயசேவைத் திட்டத்தில் மொத்தம் ஐந்து பயனர் இடங்கள் மட்டுமே அனுமதிக்கப்படும். கூட்டுப்பணியாளர்கள் அதே நிறுவனத்தில் சரிபார்க்கப்பட்டிருக்க வேண்டும். சரிபார்க்கப்பட்ட ஒவ்வொரு மின்னஞ்சல் முகவரியும் ஒரே நேரத்தில் ஒரே ஓர் ஆராய்ச்சியாளர் வர்க்ஸ்பேஸில் மட்டுமே இடம்பெற முடியும். மேலும் SSO, SCIM, இணையக் கள உரிமைகோரல், தானியங்கு வர்க்ஸ்பேஸ் கண்டறிதல் மற்றும் தானாக இணைதல் ஆகியவை கிடைக்காது. இந்தச் சலுகை ChatGPT அணுகலை மட்டும் உள்ளடக்கும்; OpenAI API கிரெடிட்கள் இதில் அடங்காது.
சரிபார்ப்பு அல்லது எனது விண்ணப்பம் தொடர்பாக எவ்வாறு உதவி பெறுவது?
முதலில் SheerID காட்டும் ஆதரவு வழிமுறைகளைப் பின்பற்றவும். இன்னும் உதவி தேவைப்பட்டால், ஹெல்ப் சென்டரில் உள்ள அரட்டைச் சாளரத்தைப் பயன்படுத்தி OpenAI ஆதரவுக் குழுவிடம் உதவிக் கோரிக்கையைத் தொடங்கவும்.