கண்ணோட்டம்

ChatGPT-இல் தொடர்ச்சியான வேலைகளுக்கான பொறுப்பை அணியினர் பகிர்ந்துகொள்ள அணிப் பணிகள் உதவுகின்றன. அங்கீகரிக்கப்பட்ட கருவிகளையும் வர்க்ஸ்பேஸ் இணைப்புகளையும் பயன்படுத்தி, அட்டவணை அல்லது ஆதரிக்கப்படும் தூண்டிக்கு ஏற்ப பணிகள் மேகக் கணினிச் சூழலில் இயங்குகின்றன. அனுமதியுள்ள அணியினர் முடிவுகளை மதிப்பாய்வு செய்யலாம், வழிமுறைகளைப் புதுப்பிக்கலாம், வேலைத் தேவைகள் மாறும்போது அதற்கேற்ப பணிகளைப் பராமரிக்கலாம்.

தவறாமல் செய்ய வேண்டிய, பலர் சேர்ந்து நிர்வகிக்க வேண்டிய வேலைகளுக்கு அணிப் பணிகளைப் பயன்படுத்துங்கள். எடுத்துக்காட்டாக, நீங்கள்:

• அங்கீகரிக்கப்பட்ட ஆதாரங்களிலிருந்து வாடிக்கையாளர்கள் தொடர்பான மாற்றங்களின் தினசரிச் சுருக்கத்தைத் தயாரிக்கலாம்.

• முன்னேற்றம், தடைகள், அடுத்த படிகள், ஆதார இணைப்புகள் ஆகியவற்றுடன் வாராந்திரத் திட்ட நிலவர அறிக்கையை அங்கீகரிக்கப்பட்ட Slack சேனலில் பதிவிடலாம்.

• தேர்ந்தெடுத்த ஆவணங்கள் மற்றும் சமீபத்திய தகவல்களிலிருந்து கூட்ட நிகழ்ச்சி நிரலையும் சுருக்க அறிக்கையையும் தயாரிக்கலாம்.

• தேர்ந்தெடுத்த ஆதாரங்களிலிருந்து ஆராய்ச்சிச் சுருக்கத்தைத் தொடர்ச்சியாக உருவாக்கலாம்.

பகிரப்பட்ட உரிமையால், பணியை உருவாக்கியவர் இல்லாதபோதும் சக பணியாளர்கள் அதைப் பராமரிக்கலாம். ஒரு பணி அணுகக்கூடிய தகவல்களும் செய்யக்கூடிய செயல்களும், அமைக்கப்பட்ட இணைப்புகளையும் அனுமதிகளையும் பொறுத்தவை.

கிடைக்கும் நிலை

ChatGPT Business மற்றும் ChatGPT Enterprise வர்க்ஸ்பேஸ்களில் அணிப் பணிகள் கிடைக்கின்றன. நீங்கள் பயன்படுத்தக்கூடிய அம்சங்களையும் செயல்களையும் வர்க்ஸ்பேஸ் அனுமதிகள் தீர்மானிக்கின்றன. யார் அணிகளை உருவாக்கலாம், யார் அணிப் பணிகளை உருவாக்கலாம் அல்லது புதுப்பிக்கலாம் என்பதைத் தீர்மானிக்க, ChatGPT Enterprise நிர்வாகிகள் பங்கு அடிப்படையிலான கட்டுப்பாடுகளைப் பயன்படுத்தலாம்.

தொடங்குவதற்கு முன்

• பணிக்குப் பொறுப்பான வர்க்ஸ்பேஸையும் அணியையும் பயன்படுத்துங்கள்.

• தேவையான செயலிகளையும் மாடலையும் அணியால் பயன்படுத்த முடியும் என்பதை உறுதிப்படுத்துங்கள்.

• பணி பயன்படுத்த வேண்டிய ஆதாரங்கள், செய்ய வேண்டிய வேலை, நீங்கள் எதிர்பார்க்கும் முடிவு ஆகியவற்றை அடையாளம் காணுங்கள்.

ஓர் அணியைத் தேர்ந்தெடுங்கள்

பணி இயங்க வேண்டிய வர்க்ஸ்பேஸில் அணிகள் பட்டியலைத் திறந்து, நீங்கள் உறுப்பினராக உள்ள அணியைத் தேர்ந்தெடுங்கள். அணி உருவாக்கம், உறுப்பினர் நிலை, பகிரப்பட்ட வளங்களை அமைத்தல் பற்றி அறிய, ChatGPT-இல் அணிகள் என்பதைப் பார்க்கவும்.

பணியின் சேமிக்கப்பட்ட வழிமுறைகளையும் அணிக்காக அமைக்கப்பட்ட இணைப்புகளையும் பயன்படுத்தி, அணிப் பணிகள் அணியின் சேவைக் கணக்கில் மேகக் கணினிச் சூழலில் இயங்குகின்றன. அணிக்காக ஒரு பணியை உருவாக்குவதால், அது உங்கள் தனிப்பட்ட கணக்கின் பணியாக மாறாது.

அணுகலைப் புரிந்துகொள்ளுங்கள்

பணியை உருவாக்கவோ நிர்வகிக்கவோ உங்களுக்கு உள்ள உரிமை, உங்கள் அணி உறுப்பினர் நிலை மற்றும் வர்க்ஸ்பேஸ் அனுமதிகளைப் பொறுத்தது. ஒரு வர்க்ஸ்பேஸ் அனுமதி உங்களை அணியில் சேர்க்காது; எல்லாப் பணிகளுக்கும் அணுகலையும் வழங்காது. தேவையான ஒரு செயலுக்கான அணுகல் உங்களிடம் இல்லையெனில், உங்கள் வர்க்ஸ்பேஸ் நிர்வாகியிடம் கேளுங்கள்.

ஒவ்வொரு செயலுக்குமான அனுமதிகளுக்கு ஏற்ப, அணி உறுப்பினர்கள் பணிகளைப் பார்க்கலாம், இயக்கலாம், திருத்தலாம், இடைநிறுத்தலாம், மீண்டும் தொடங்கலாம் அல்லது நீக்கலாம். அணியையே நீக்குவதற்கு அதன் உரிமையாளராக இருக்க வேண்டும். ஓர் இயக்கத்தின் உரையாடலில் நீங்கள் செய்யக்கூடிய செயல்கள், அந்த இயக்கத்தில் உங்களுக்கு உள்ள அணுகலைப் பொறுத்தவை. வர்க்ஸ்பேஸ் அனுமதிகளும் அணிப் பங்குகளும் இணைந்து செயல்படும் விதத்தை அறிய, ChatGPT-இல் அணிகள் என்பதைப் பார்க்கவும்.

நிறுவனக் கருவிகளுக்கான அங்கீகரிக்கப்பட்ட இணைப்புகளை வர்க்ஸ்பேஸ் நிர்வாகிகள் நிர்வகித்து, அவற்றை யார் பயன்படுத்தலாம் என்பதைத் தீர்மானிக்கிறார்கள். உங்கள் அணியின் பணிகளுக்கு ஓர் இணைப்பைப் பயன்படுத்துவதற்கு முன், இணைக்கப்பட்ட கணக்கையும் அதன் அணுகலையும் சரிபாருங்கள்.

வர்க்ஸ்பேஸ் இணைப்புகளையும் வழிமுறைகளையும் அமைக்கவும்

வர்க்ஸ்பேஸ் நிர்வாகிகள் வர்க்ஸ்பேஸ் இணைப்புகளை அமைத்து, அவற்றை யார் பயன்படுத்தலாம் என்பதைக் கட்டுப்படுத்துகிறார்கள். தகுதியுள்ள வர்க்ஸ்பேஸ் இணைப்புகளில் எவற்றை அணிக்குச் செயல்படுத்த வேண்டும் என்பதை அணி உரிமையாளர் தேர்ந்தெடுக்கிறார். தகவல்களை அணுகவும் அனுமதிக்கப்பட்ட செயல்களைச் செய்யவும், இணைக்கப்பட்ட கணக்குகளின் அனுமதிகளைப் பணிகள் பயன்படுத்துகின்றன.

ஒவ்வொரு இணைப்பும் அதற்கெனக் குறிக்கப்பட்ட கணக்கைப் பயன்படுத்துகிறது. எந்தத் தரவுகளும் செயல்களும் கிடைக்கும் என்பதை அந்தக் கணக்கின் அனுமதிகள் தீர்மானிக்கின்றன. ஒவ்வொருவரும் தனிப்பட்ட கணக்கை இணைக்காமலேயே, அணி உறுப்பினர்கள் அங்கீகரிக்கப்பட்ட அணுகலை மீண்டும் பயன்படுத்தலாம்.

பணியை உருவாக்குவதற்கு முன், தேவையான இணைப்புகள் உங்கள் அணிக்குக் கிடைக்கின்றன என்பதை உறுதிப்படுத்துமாறு வர்க்ஸ்பேஸ் நிர்வாகியிடம் கேளுங்கள். எடுத்துக்காட்டாக, Slack-இல் திட்ட நிலவரத்தைப் பதிவிடும் பணிக்கு அதன் மூல ஆவணங்களை அணுகும் உரிமையும் தேர்ந்தெடுத்த சேனலில் பதிவிடும் அனுமதியும் தேவை.

தேவையான இணைப்புகளைத் தயார்செய்யுங்கள்

1. உங்கள் பணிக்குத் தேவையான செயலிகளையும் அது பயன்படுத்த வேண்டிய தகவல்கள் அல்லது செயல்களையும் அடையாளம் காணுங்கள்.

2. அங்கீகரிக்கப்பட்ட இணைப்புகளை அமைத்து உங்கள் அணிக்குக் கிடைக்கச் செய்யுமாறு வர்க்ஸ்பேஸ் நிர்வாகியிடம் கேளுங்கள்.

3. உங்கள் பணிக்குத் தேவையான வர்க்ஸ்பேஸ் இணைப்புகளைத் தேர்ந்தெடுக்குமாறு அணி உரிமையாளரிடம் கேளுங்கள். நீங்களே உரிமையாளராக இருந்தால், அணுக அனுமதியுள்ள இணைப்புகளைத் தேர்ந்தெடுங்கள்.

4. இணைக்கப்பட்ட கணக்குகளை மதிப்பாய்வு செய்து, தேவையான ஆதாரங்களையும் சேருமிடங்களையும் அவற்றால் அணுக முடியும் என்பதை உறுதிப்படுத்துங்கள்.

5. பணிக்குத் தேவையான செருகுநிரல்களைச் சேர்த்து, அவை வழங்கும் கருவிகளையும் வழிமுறைகளையும் மதிப்பாய்வு செய்யுங்கள்.

ஒரு செருகுநிரல் முடக்கப்பட்டிருந்தாலோ பொருத்தமான இணைப்பு கிடைக்கவில்லை என்றாலோ, அணுகல் பற்றி உங்கள் வர்க்ஸ்பேஸ் நிர்வாகியிடம் கேளுங்கள்.

செருகுநிரலைச் சேர்ப்பது அல்லது பகிர்வது வேறு; ஒரு கணக்கை இணைப்பது வேறு. செருகுநிரல் கருவிகள், திறன்கள் அல்லது வழிமுறைகளை வழங்குகிறது. அமைக்கப்பட்ட இணைப்பு, செயலிக்குத் தேவையான அணுகலை வழங்குகிறது. செருகுநிரலைப் பகிர்வதால் உங்கள் தனிப்பட்ட செயலி இணைப்பு பகிரப்படாது.

செயல்படுத்தப்பட்ட வர்க்ஸ்பேஸ் இணைப்பை ஒரு பணி பயன்படுத்த, அணி உறுப்பினர்கள் ஒவ்வொருவரும் அதே சேவை வழங்குநர் கணக்கை இணைக்க வேண்டியதில்லை. வர்க்ஸ்பேஸ் மற்றும் இணைப்புக்கான அனுமதிகள் தொடர்ந்து பொருந்தும்.

பணி இயங்குவதற்கு முன், தேவைப்படும் செயலி உள்நுழைவுகளை முடித்துவிடுங்கள். உங்கள் மேற்பார்வையின்றி இயங்கும் பணியால், உங்களுக்காக ஒரு புதிய செயலி உள்நுழைவை முடிக்க முடியாது. இணைக்கப்பட்ட செயலிகளில் செயல்களைச் செய்வதற்கான ஒப்புதல் தேவைகள் எதையும் இது நீக்காது.

பணிக்கான வழிமுறைகளை எழுதுங்கள்

பணியின் சேமிக்கப்பட்ட வழிமுறைகளில் ஆதாரங்கள், வெளியீட்டு வடிவம், மதிப்பாய்வுக்கான அளவுகோல்கள் ஆகியவற்றைச் சேருங்கள். தொடர்ச்சியான பணிகளைப் பராமரிக்க அணியினருக்குத் தேவையான வழிகாட்டுதல்களைச் சேருங்கள். ஒரு ChatGPT Space-ஐ அணியுடன் பகிர்வதால், அதன் உள்ளடக்கம் அனைத்தும் ஒவ்வொரு இயக்கத்தின் வழிமுறைகளிலும் சேர்க்கப்படாது. உருவாக்கியவரின் தனிப்பட்ட சேமிக்கப்பட்ட நினைவுகள், தனிப்பயன் வழிமுறைகள் அல்லது அரட்டை வரலாறு ஆகியவை அணிப் பணிகளுக்குத் தானாகக் கிடைக்காது.

அணிப் பணியை உருவாக்குங்கள்

1. பணிக்குப் பொறுப்பான அணியைத் திறக்கவும்.

2. அணியின் திட்டமிடப்பட்டவை பகுதியில் புதிய பணியைத் தொடங்குங்கள்.

3. பொறுப்பான அணி எது என்பதை உறுதிப்படுத்தி, பணியின் பெயர் என்பதை உள்ளிடுங்கள்.

4. பயன்படுத்த வேண்டிய ஆதாரங்கள், செய்ய வேண்டிய வேலை, நீங்கள் எதிர்பார்க்கும் முடிவு ஆகியவற்றை விளக்கும் வழிமுறைகளை உள்ளிடுங்கள்.

5. ஒரு தூண்டியைத் தேர்ந்தெடுத்து, அதன் நேரம் அல்லது நிகழ்வு நிபந்தனைகளை அமைக்கவும்.

6. செருகுநிரல்கள் என்பதையும் மேம்பட்டவை என்பதன் கீழுள்ள மாடல் உள்ளிட்ட அமைப்புகளையும் மதிப்பாய்வு செய்யுங்கள்.

7. உருவாக்கு என்பதைத் தேர்ந்தெடுங்கள்.

அணி பயன்படுத்தக்கூடிய மாடலைத் தேர்ந்தெடுங்கள். உங்கள் சொந்தக் கணக்கில் கிடைக்கும் மாடல், அணியின் சேவைக் கணக்கில் கிடைக்காமல் இருக்கலாம்.

நேரம் அல்லது நிகழ்வைத் தேர்ந்தெடுங்கள்

தொடர்ச்சியான பணிகளுக்கு அட்டவணை என்பதையும், ஒருமுறை மட்டும் இயக்க தேதி மற்றும் நேரம் என்பதையும் பயன்படுத்துங்கள். ஒவ்வொரு பணிக்கும் தனித்தனி நேர மண்டலம் சேமிக்கப்படும். பணியை உருவாக்கும் அல்லது புதுப்பிக்கும் முன், சேமிக்கப்பட்ட நேரத்தையும் நேர மண்டலத்தையும் மதிப்பாய்வு செய்யுங்கள்.

புதிய Gmail மின்னஞ்சல் அல்லது Slack செய்தி போன்ற, இணைக்கப்பட்ட செயலிகளில் ஆதரிக்கப்படும் நிகழ்வுகளுக்கேற்ப பணிகள் செயல்படலாம். உங்கள் அணிக்குக் கிடைக்கும் தூண்டி ஒன்றைத் தேர்ந்தெடுத்து, தேவையான இணைப்பும் அனுமதிகளும் இருப்பதை உறுதிப்படுத்துங்கள்.

Slack தூண்டியைப் பயன்படுத்தும்போது, கண்காணிக்க வேண்டிய சேனலைத் தேர்ந்தெடுங்கள். எந்த நிகழ்வு பணியைத் தொடங்க வேண்டும் என்பதை விவரித்து, சேமிப்பதற்கு முன் அதன் நிபந்தனைகளை மதிப்பாய்வு செய்யுங்கள்.

எடுத்துக்காட்டு: வாராந்திரத் திட்ட நிலவர அறிக்கையை வரையுங்கள்

திட்ட ஆவணங்களிலிருந்து வாராந்திர வரைவைத் தயாரிக்க அணிப் பணியைப் பயன்படுத்தலாம்:

1. வேலைக்குப் பொறுப்பான அணியைத் தேர்ந்தெடுத்து, அதன் இணைப்பால் திட்ட ஆவணங்களை அணுக முடியும் என்பதை உறுதிப்படுத்துங்கள்.

2. பணி வழிமுறைகளில் ஆவணங்களுக்கான இணைப்புகளைச் சேர்த்து, வெளியீடு எப்படி இருக்க வேண்டும் என்பதை விவரியுங்கள். எடுத்துக்காட்டு: “இந்தத் திட்ட ஆவணங்களைப் பயன்படுத்தி, முன்னேற்றம், தடைகள், அடுத்த படிகள் ஆகியவற்றுடன் வாராந்திர நிலவர அறிக்கையை வரையுங்கள். ஒவ்வொரு புதிய தகவலுக்கும் அதன் ஆதார இணைப்பைச் சேருங்கள்.”

3. அட்டவணை என்பதைத் தேர்ந்தெடுத்து, நேரத்தை அமைத்துப் பணியை உருவாக்குங்கள்.

4. இப்போது இயக்கு என்பதைத் தேர்ந்தெடுங்கள். பிறகு முந்தைய இயக்கங்கள் என்பதைத் திறந்து வரைவை மதிப்பாய்வு செய்து, அதன் ஆதாரக் குறிப்புகளைச் சரிபாருங்கள்.

5. தேவைப்பட்டால், வழிமுறைகள் அல்லது அமைப்புகளை மேம்படுத்த திருத்து என்பதைத் தேர்ந்தெடுத்து, மீண்டும் இயக்கி முடிவை மதிப்பாய்வு செய்யுங்கள்.

Slack அல்லது Microsoft Teams-இலிருந்து தொடங்குங்கள்

உங்கள் நிறுவனம் @ChatGPT-ஐச் செயல்படுத்தியுள்ள இடங்களில், தொடர்ச்சியான பணிகளை அமைக்குமாறு அதைக் கேட்கலாம். பணிக்குப் பொறுப்பான அணி, செய்ய வேண்டிய வேலை, அது இயங்க வேண்டிய நேரம் ஆகியவற்றைக் குறிப்பிடுங்கள். தேர்ந்தெடுக்கப்பட்ட அணியை மதிப்பாய்வு செய்து, கோரப்படும் இணைப்பு அமைப்புகளை முடிக்கவும்.

எடுத்துக்காட்டு: “வாரத்தின் ஒவ்வொரு வேலைநாள் காலையிலும், இந்த அங்கீகரிக்கப்பட்ட ஆதாரங்களிலிருந்து வாடிக்கையாளர்கள் தொடர்பான மாற்றங்களின் சுருக்கத்தை வாடிக்கையாளர் கணக்குகளை நிர்வகிக்கும் அணிக்காகத் தயாரியுங்கள்.”

Slack சேனல் அல்லது Microsoft Teams உரையாடல், பணியைத் தொடங்குவதற்கான ஓர் இடம் மட்டுமே. பணிக்கு எந்த அணி பொறுப்பு என்பதையும் அது எந்த இணைப்புகளைப் பயன்படுத்துகிறது என்பதையும் சரிபாருங்கள். உங்கள் தனிப்பட்ட அரட்டைத் தளக் கணக்கு, அணிக்கான செயலி அணுகலைத் தானாக வழங்காது.

பணியை இயக்கி முடிவுகளை மதிப்பாய்வு செய்யுங்கள்

1. பணியின் விவரங்களைத் திறக்கவும்.

2. சேமிக்கப்பட்ட வழிமுறைகளுடன் இயக்கத்தைத் தொடங்க, இப்போது இயக்கு என்பதைத் தேர்ந்தெடுங்கள்.

3. முந்தைய இயக்கங்கள் என்பதைத் திறந்து, ஓர் இயக்கத்தின் உரையாடலையும் முடிவையும் மதிப்பாய்வு செய்ய அதைத் தேர்ந்தெடுங்கள்.

பதிலளிக்க அனுமதியுள்ள நீங்களும் அணியின் மற்ற உறுப்பினர்களும் அந்த இயக்கத்தின் உரையாடலில் தொடர்க் கேள்விகளைக் கேட்கலாம் அல்லது முடிவை மேம்படுத்தலாம். அடுத்தடுத்த இயக்கங்களுக்கான வழிமுறைகள் அல்லது அமைப்புகளை மாற்ற, பணியில் திருத்து என்பதைத் தேர்ந்தெடுங்கள்.

ஓர் இயக்கத்திற்கான அணுகல் இருப்பதால், அதனுடன் இணைக்கப்பட்ட மூல ஆவணங்கள் அல்லது இணைக்கப்பட்ட செயலிகளில் உருவாக்கப்பட்ட கோப்புகளுக்கான அணுகல் தானாகக் கிடைக்காது. அந்த வளங்களுக்கு இணைக்கப்பட்ட செயலியின் பகிர்வு அனுமதிகளே தொடர்ந்து பொருந்தும்.

கோரப்பட்ட வேலை வெற்றிகரமாகச் செய்யப்பட்டதா என்பதை அறிய முடிவை மதிப்பாய்வு செய்யுங்கள். கோப்பைப் புதுப்பிப்பது அல்லது செய்தியை அனுப்புவது பணியின் நோக்கமாக இருந்தால், அந்தச் சேருமிடத்தையும் சரிபாருங்கள். நேர அடிப்படையிலான அட்டவணை நிறைவடைந்தது எனக் காட்டினால், அதில் அடுத்தடுத்த இயக்கங்கள் எதுவும் திட்டமிடப்படவில்லை என்று பொருள். ஒரு தனிப்பட்ட இயக்கம் வேலையை வெற்றிகரமாக முடித்துவிட்டதை அது உறுதிப்படுத்தாது.

அடுத்தடுத்த இயக்கங்களை நிர்வகியுங்கள்

பணியின் நிர்வாகக் கட்டுப்பாடுகளில், உங்கள் கணக்கிற்குக் கிடைக்கும் செயல்களைப் பயன்படுத்துங்கள்:

• பணியின் சேமிக்கப்பட்ட வழிமுறைகள் அல்லது அமைப்புகளை மாற்ற திருத்து என்பதைப் பயன்படுத்துங்கள்.

• இனி திட்டமிட்டபடியும் நிகழ்வுகளால் தூண்டப்பட்டும் நடைபெறவுள்ள இயக்கங்களை நிறுத்திவைக்க இடைநிறுத்து என்பதைப் பயன்படுத்துங்கள்.

• அடுத்தடுத்த இயக்கங்களை மீண்டும் செயல்படுத்த மீண்டும் தொடங்கு என்பதைப் பயன்படுத்துங்கள்.

• பணியை அகற்ற நீக்கு என்பதைப் பயன்படுத்துங்கள்.

ஏற்கெனவே நடந்துகொண்டிருக்கும் இயக்கங்களைத் தனியாகச் சரிபாருங்கள். பணியை இடைநிறுத்துவதோ நீக்குவதோ, நடந்துகொண்டிருக்கும் இயக்கத்தை நிறுத்தும் என்று நம்ப வேண்டாம்.

பயன்பாட்டையும் செலவினத்தையும் புரிந்துகொள்ளுங்கள்

அணிப் பணிகளுக்குப் பொருந்தும் செலவினக் கட்டுப்பாடுகளை வர்க்ஸ்பேஸ் நிர்வாகிகள் நிர்வகிக்கிறார்கள். தனிப்பட்ட திட்டமிடப்பட்ட பணிகளின் வரம்புகள், பகிரப்பட்ட வேலைக்கான செலவின வரம்புகளை நிர்ணயிப்பதில்லை.

ஒரு பணி பயன்பாடு அல்லது செலவின வரம்பு தொடர்பான பிழையைக் காட்டினால், அந்தச் செய்தியைப் பதிவு செய்து, தொடர்புடைய வர்க்ஸ்பேஸ் அமைப்புகளை மதிப்பாய்வு செய்ய உங்கள் வர்க்ஸ்பேஸ் நிர்வாகியிடம் கேளுங்கள்.

மீண்டும் முயல்வதற்கு முன் பணியின் இயக்க வரலாற்றைச் சரிபாருங்கள். குறிப்பாக, அந்தப் பணி செய்திகளை அனுப்பினாலோ கோப்புகளை மாற்றினாலோ இதைச் செய்யுங்கள்.

பணியில் உள்ள சிக்கல்களைத் தீர்க்கவும்

எதிர்பார்த்த முடிவைக் காணவில்லை

1. சரியான வர்க்ஸ்பேஸிலும் அணியிலும் இருப்பதை உறுதிப்படுத்தி, பணியின் விவரங்களைத் திறக்கவும்.

2. முந்தைய இயக்கங்கள் என்பதைத் திறந்து, எதிர்பார்த்த இயக்கத்தைத் தேடுங்கள். அது இருந்தால், அதைத் திறந்து முடிவையும் பிழைச் செய்திகள் ஏதேனும் உள்ளதா என்பதையும் சரிபாருங்கள்.

3. பணி எப்போது இயங்க வேண்டும் என்பதை அறிய, சேமிக்கப்பட்ட அட்டவணை அல்லது நிகழ்வு நிபந்தனைகளை மதிப்பாய்வு செய்யுங்கள்.

4. இயக்கத்தில் செயலி அணுகல் பிழை காட்டப்பட்டால், இணைப்பையும் இணைக்கப்பட்ட கணக்கின் அனுமதிகளையும் சரிபாருங்கள்.

5. செய்திகளை அனுப்பும் அல்லது கோப்புகளை மாற்றும் பணியை மீண்டும் இயக்குவதற்கு முன், முந்தைய இயக்கம் ஏற்கெனவே என்ன செய்துள்ளது என்பதைச் சரிபாருங்கள்.

சிக்கல் தொடர்ந்தால், அணி மற்றும் பணியின் பெயர்கள், எதிர்பார்த்த இயக்க நேரம் மற்றும் நேர மண்டலம், துல்லியமான பிழைச் செய்தி, நீங்கள் முயன்ற படிகள் ஆகியவற்றை உங்கள் வர்க்ஸ்பேஸ் நிர்வாகி அல்லது ஆதரவுக் குழுவுடன் பகிருங்கள்.

தேர்ந்தெடுத்த மாடல் கிடைக்கவில்லை

தேர்ந்தெடுத்த மாடல் அணிக்குக் கிடைக்காமல் போனால், பணி இடைநிறுத்தப்படும்.

1. பணியின் திருத்தக் கட்டுப்பாடுகளைத் திறக்கவும்.

2. மேம்பட்டவை என்பதில், கிடைக்கும் மாடல் ஒன்றைத் தேர்ந்தெடுத்து, சேமி என்பதைத் தேர்ந்தெடுங்கள்.

3. மீண்டும் தொடங்கு என்பதைத் தேர்ந்தெடுத்து, அடுத்த இயக்கத்தைச் சரிபாருங்கள்.

செயலியால் தகவலை அணுகவோ ஒரு செயலைச் செய்யவோ முடியவில்லை

1. அணிக்காக அமைக்கப்பட்ட இணைப்பைச் சரிபார்த்து, அது பயன்படுத்தும் சேவை வழங்குநர் கணக்கை அடையாளம் காணுங்கள்.

2. சேவை வழங்குநர் கணக்கால் தேவையான தகவலை அணுகவோ செயலைச் செய்யவோ முடியும் என்பதை உறுதிப்படுத்துங்கள்.

3. பணிக்குத் தேர்ந்தெடுக்கப்பட்ட செருகுநிரல்களையும் சேமிக்கப்பட்ட வழிமுறைகளையும் மதிப்பாய்வு செய்யுங்கள்.

உங்கள் தனிப்பட்ட அரட்டையில் வெற்றிபெறும் கோரிக்கை வேறு இணைப்பைப் பயன்படுத்தக்கூடும். செருகுநிரலை மீண்டும் பகிர்வது மட்டுமே உங்கள் தனிப்பட்ட செயலி இணைப்பைப் பகிரவோ, இணைக்கப்பட்ட செயலியில் அனுமதிகளை வழங்கவோ செய்யாது.

ஒரு செயல் அல்லது பணியைக் காணவில்லை

சரியான வர்க்ஸ்பேஸிலும் அணியிலும் இருப்பதை உறுதிப்படுத்தி, தொடர்புடைய அனுமதிகளைச் சரிபார்க்குமாறு உங்கள் வர்க்ஸ்பேஸ் நிர்வாகியிடம் கேளுங்கள். அணியை உருவாக்குவதற்கான அனுமதி, எல்லா அணிகளுக்கும் இயக்கங்களுக்கும் அணுகலை வழங்காது.

அடிக்கடி கேட்கப்படும் கேள்விகள்

அணிக்கும் குழுவுக்கும் என்ன வேறுபாடு?

உறுப்பினர்களை ஒழுங்கமைக்கவும், வளங்களைப் பகிரவும், ஒதுக்கப்பட்ட பங்குகள் மூலம் அம்சங்களுக்கான அணுகலை நிர்வகிக்கவும் வர்க்ஸ்பேஸ் குழு நிர்வாகிகளுக்கு உதவுகிறது. குழுக்களை கைமுறையாக நிர்வகிக்கலாம் அல்லது உங்கள் நிறுவனத்தின் அடையாளச் சேவை வழங்குநரிடமிருந்து ஒத்திசைக்கலாம்.

பக்கங்களையும் ChatGPT Space-களையும் பகிரவும் தொடர்ச்சியான பணிகளைப் பராமரிக்கவும் ஓர் அணி ChatGPT-இல் நபர்களை ஒன்றிணைக்கிறது. அனுமதி உள்ள வர்க்ஸ்பேஸ் உறுப்பினர்கள் அணிகளை உருவாக்கலாம். எடுத்துக்காட்டாக, ஒரு துறைக்கு ஓர் அம்சத்திற்கான அணுகலை வழங்க நிர்வாகி குழுவைப் பயன்படுத்தலாம். அதே நேரத்தில், சக பணியாளர்கள் திட்ட வளங்களையும் தொடர்ச்சியான வேலைகளையும் பகிர ஓர் அணியை உருவாக்கலாம்.

அணி உறுப்பினராக இருப்பதால் வர்க்ஸ்பேஸ் அனுமதிகளை மீற முடியாது. ChatGPT Enterprise மற்றும் Edu-இல் குழுக்களை நிர்வகிப்பது பற்றி மேலும் அறியுங்கள்.

ChatGPT மூடப்பட்டிருந்தாலும் எனது பணி இயங்குமா?

ஆம். அணிப் பணிகள் மேகக் கணினிச் சூழலில் இயங்குவதால், திட்டமிட்ட இயக்கத்திற்காக ChatGPT-ஐத் திறந்து வைத்திருக்கவோ உங்கள் கணினியை உறக்கநிலைக்குச் செல்லாமல் வைத்திருக்கவோ வேண்டியதில்லை. இருப்பினும், பணிக்குத் தேவையான இணைப்புகளும் அனுமதிகளும் இருக்க வேண்டும்.

ஒரு பணியில் என்னென்ன வழிமுறைகளைச் சேர்க்க வேண்டும்?

பயன்படுத்த வேண்டிய ஆதாரங்கள், செய்ய வேண்டிய வேலை, எதிர்பார்க்கும் வெளியீடு, மதிப்பாய்வுக்கான அளவுகோல்கள் ஆகியவற்றைச் சேருங்கள். அணியினர் மதிப்பாய்வு செய்து பராமரிக்க உதவும் அத்தியாவசிய வழிகாட்டுதல்களைச் சேமிக்கப்பட்ட பணியில் வைத்திருங்கள். முந்தைய இயக்கங்கள் அனைத்தையும் ChatGPT பின்னணித் தகவலாகப் பயன்படுத்தும் என்று கருத வேண்டாம்.

அடுத்தடுத்த இயக்கங்களில் ஒரு பணி செய்வதை எப்படி மாற்றுவது?

பணியின் சேமிக்கப்பட்ட வழிமுறைகள் அல்லது அமைப்புகளைத் திருத்தி, அடுத்த இயக்கத்தை மதிப்பாய்வு செய்யுங்கள். அணியின் மற்ற உறுப்பினர்கள் பணியைப் புரிந்துகொண்டு பராமரிக்க உதவும் பொதுவான வழிகாட்டுதல்களை அந்தச் சேமிக்கப்பட்ட வழிமுறைகளில் வைத்திருங்கள்.

தோல்வியுற்ற இயக்கங்கள் தானாக மீண்டும் முயற்சிக்கப்படுமா?

சில தற்காலிகச் செயலாக்கப் பிழைகள் ஏற்பட்டால் தானாக மீண்டும் முயற்சி செய்யப்படும். ஓர் இயக்கத்தில் செயலியின் ஒரு செயல் தோல்வியடைவதால், தானாக மறுமுயற்சி தொடங்கும் என்று சொல்ல முடியாது. மீண்டும் முயல்வதற்கு முன், முந்தைய இயக்கங்கள் என்பதில் முடிவையும் பிழைகள் ஏதேனும் உள்ளதா என்பதையும் மதிப்பாய்வு செய்யுங்கள்.