கண்ணோட்டம்
ChatGPT இல் உங்கள் பக்கங்கள், பதிவேற்றிய கோப்புகள் மற்றும் பிற படைப்புகளை ஒரே இடத்தில் வைத்திருக்க ChatGPT Space உதவுகிறது. ChatGPT உதவியுடன் பக்கங்களை உருவாக்கித் திருத்தலாம், தொடர்புடைய உள்ளடக்கத்தைப் பணிவெளிகளில் ஒழுங்கமைக்கலாம், பிறருடன் இணைந்து பணியாற்ற உங்கள் படைப்புகளைப் பகிரலாம்.
ChatGPT Space அணுகல் உள்ள கணக்குகளில் நூலகத்திற்குப் பதிலாக ChatGPT Space இடம்பெறும். திட்டங்கள் தனியாகவே இருக்கும். எனவே, உங்கள் திட்ட அரட்டைகள், கோப்புகள் மற்றும் வழிமுறைகளுக்கு அவற்றைத் தொடர்ந்து பயன்படுத்தலாம்.
கிடைக்கும் நிலை
ChatGPT Pro, Business அல்லது Enterprise திட்டத்தில், ChatGPT Space-இல் உள்ளடக்கத்தை உருவாக்கவும் திருத்தவும் முடியும். நிர்வகிக்கப்படும் பணியிடங்களில், நீங்கள் பயன்படுத்தக்கூடிய பகிர்வு விருப்பங்களை உங்கள் நிறுவனத்தின் பகிர்வு அமைப்புகள் தீர்மானிக்கின்றன. உறுப்பினர்கள் இணைந்து பணியாற்றுவதற்கு முன், Enterprise நிர்வாகிகள் பகிர்வை இயக்க வேண்டியிருக்கலாம்.
பக்கங்களை உருவாக்கவும் திருத்தவும், இணையத்தில் அல்லது ChatGPT கணினிச் செயலியில் ChatGPT Space-ஐப் பயன்படுத்தவும். கைபேசியில் பக்கங்களைக் கண்டறியவும், படிக்கவும், பகிரவும் முடியும். பக்கங்களுக்கும் துணைப் பக்கங்களுக்கும் இடையே செல்லவும் முடியும். கைபேசியில் பக்கங்களைத் திருத்த முடியாது.
ChatGPT Space அணுகல் உள்ள தகுதியான கணக்குகளுக்கு விளக்கக்காட்சி வசதி படிப்படியாக வழங்கப்படுகிறது. விளக்கக்காட்சிகளை உருவாக்கி, அவற்றில் இணைந்து பணியாற்றுவது எப்படி என்பதை அறியவும். விரிதாள்கள் விரைவில் வருகின்றன.
கனடா அல்லது ஐக்கிய அரபு அமீரகத்தில் டேட்டா ரெசிடென்சி உள்ள Enterprise மற்றும் Business பணியிடங்களுக்கு ChatGPT Space விரைவில் வருகிறது.
பக்கங்களையும் பணிவெளிகளையும் புரிந்துகொள்ளவும்
பக்கம் என்பது திருத்தக்கூடிய ஆவணமாகும். எடுத்துக்காட்டாக, திட்டச் சுருக்கம், கூட்டக் குறிப்புகள், ஆராய்ச்சிச் சுருக்கம் அல்லது குழுவுக்கான சமீபத்திய தகவல்களுக்குப் பக்கத்தைப் பயன்படுத்தலாம். நீங்களும் உங்களுடன் இணைந்து பணியாற்றுபவர்களும் ஒரே பக்கத்தைத் திருத்தலாம். ஒவ்வொருவரும் உள்ளடக்கம் தொடர்பான உதவியைத் தங்களது ChatGPT இடம் கேட்கலாம்.
பணிவெளி என்பது தொடர்புடைய உள்ளடக்கத்தை ஒருங்கிணைக்கும் இடமாகும். உங்களுக்கென ஒரு தனிப்பட்ட பணிவெளி உள்ளது. ஒரு தலைப்பு தொடர்பான அல்லது குழுவுடன் மேற்கொள்ளும் பணிகளை ஒழுங்கமைக்க மற்ற பணிவெளிகளைப் பயன்படுத்தலாம். ChatGPT Space இல் கோப்புறைகளும் பக்கங்களும் இருக்கலாம். ஒரு பக்கத்தில் துணைப் பக்கங்களும் இருக்கலாம். இதனால் ஒரு சுருக்கத்தையும் அதற்கான ஆதாரங்களையும் ஒன்றாக வைத்திருக்கலாம்.
திட்டங்கள் தொடர்ந்து அரட்டைகள், கோப்புகள் மற்றும் திட்ட வழிமுறைகளை ஒழுங்கமைக்க உதவும். பணிவெளியை உருவாக்குவதோ பயன்படுத்துவதோ ஏற்கெனவே உள்ள உங்கள் திட்டங்களுக்கு மாற்றாக அமையாது. ChatGPT இல் திட்டங்கள் பற்றி மேலும் அறிக.
பணிவெளியை உருவாக்கவும்
ஒரு பணிவெளியை உருவாக்கி அதற்குப் பெயரிடுமாறு ChatGPT இடம் கேட்கவும். எடுத்துக்காட்டாக: “இணையதள அறிமுகம் என்ற பெயரில் ஒரு பணிவெளியை உருவாக்கு.”
ஒரு பக்கத்தை உருவாக்குமாறு ChatGPT இடம் கேட்கும்போது, அதை எந்தப் பணிவெளியில் சேர்க்க வேண்டும் என்பதைக் குறிப்பிடவும். எடுத்துக்காட்டாக: “இணையதள அறிமுகம் பணிவெளியில் எங்கள் இலக்குகள், கால அட்டவணை, அடுத்த படிகள் ஆகியவற்றுடன் திட்டக் கண்ணோட்டப் பக்கத்தை உருவாக்கு.”
பக்கத்தை உருவாக்கவும்
ஒரு உரையாடலிலிருந்து பக்கத்தைத் தொடங்கலாம், ChatGPT Space இல் நேரடியாக எழுதத் தொடங்கலாம் அல்லது ChatGPT Space முகப்பிலுள்ள வார்ப்புருவைப் பயன்படுத்தலாம்.
உரையாடலிலிருந்து பக்கத்தை உருவாக்க:
நீங்கள் பயன்படுத்த விரும்பும் தகவல்கள் உள்ள உரையாடலைத் திறக்கவும் அல்லது புதிய உரையாடலைத் தொடங்கவும்.
ஒரு பக்கத்தை உருவாக்குமாறு ChatGPT இடம் கேட்கவும். அதில் என்ன இருக்க வேண்டும் என்பதை விவரித்து, தேவையான கோப்புகள் அல்லது சூழல் தகவல்களைச் சேர்க்கவும்.
பக்கத்தைத் திறந்து உருவாக்கப்பட்ட உள்ளடக்கத்தைச் சரிபார்க்கவும். உரையை நேரடியாகத் திருத்தலாம் அல்லது மாற்றங்களைச் செய்யுமாறு ChatGPT இடம் கேட்கலாம்.
எடுத்துக்காட்டாக: “இந்த உரையாடலிலிருந்து திட்ட இலக்குகள், முடிவுகள் மற்றும் அடுத்த படிகளுடன் ஒரு பக்கத்தை உருவாக்கு.”
ChatGPT உதவியுடன் பக்கத்தைத் திருத்தவும்
ஒரு பக்கத்தைத் திறந்து நேரடியாகத் திருத்தவும் அல்லது குறிப்பிட்ட மாற்றத்தைச் செய்யுமாறு ChatGPT இடம் கேட்கவும். பக்கம் முழுவதையும் திருத்தலாம் அல்லது ஒரு பகுதியில் மட்டும் கவனம் செலுத்தலாம்.
எடுத்துக்காட்டாக:
“அறிமுகத்தைச் சுருக்கி, பரிந்துரைகளை மாற்றாமல் வைத்திரு.”
“இணைக்கப்பட்ட கூட்டக் குறிப்புகளின் சுருக்கத்தை முடிவுகள் என்பதன் கீழ் சேர்.”
“இந்த இரண்டு முன்மொழிவுகளையும் ஒப்பிட்டு, முக்கிய வேறுபாடுகளை இந்தப் பக்கத்தில் சேர்.”
பக்கங்களில் ChatGPT உருவாக்கிய விளக்கப்படங்கள், கண்காணிப்புக் கருவிகள் மற்றும் ஊடாடும் கருவிகள் இருக்கலாம். எடுத்துக்காட்டாக, அறிக்கையிலுள்ள புள்ளிவிவரங்களை ஒப்பிடும் விளக்கப்படத்தைச் சேர்க்குமாறு ChatGPT இடம் கேட்கலாம்.
குறிப்பிட்ட உரைப்பகுதி குறித்த பின்னூட்டத்தை வழங்க கருத்துகளைப் பயன்படுத்தவும். உரையைத் தேர்ந்தெடுத்து, நீங்கள் விரும்பும் மாற்றத்தை விவரிக்கும் கருத்தைச் சேர்க்கவும். விரிவான கேள்விகளுக்கு அல்லது ஆவணம் முழுவதும் மாற்றங்களைச் செய்ய பக்கத்தின் அரட்டையைப் பயன்படுத்தவும்.
பக்கத்தைப் பயன்படுத்தும் அல்லது பகிரும் முன் பெயர்கள், தேதிகள், கணக்கீடுகள் மற்றும் ஆதாரத் தகவல்களைச் சரிபார்க்கவும்.
உங்கள் படைப்புகளை ஒழுங்கமைத்துக் கண்டறியவும்
பக்கங்களையும் துணைப் பக்கங்களையும் ஒழுங்கமைக்கவும்
தொடர்புடைய பணிகளை ஒருங்கிணைக்க பணிவெளிகளைப் பயன்படுத்தவும். பக்கங்களை ஒரு முதன்மைப் பக்கத்தின் கீழ் அடுக்கி ஒழுங்கமைக்கவும். எடுத்துக்காட்டாக, ஒரு திட்டக் கண்ணோட்டப் பக்கத்தில் கூட்டக் குறிப்புகள் மற்றும் வாராந்திரத் தகவல்களுக்கான துணைப் பக்கங்கள் இருக்கலாம்.
துணைப் பக்கத்தை உருவாக்குமாறு ChatGPT இடம் கேட்கும்போது, அதன் முதன்மைப் பக்கத்தின் பெயரைக் குறிப்பிடவும்: “திட்டக் கண்ணோட்டத்தின் கீழ் கூட்டக் குறிப்புகள் என்ற துணைப் பக்கத்தை உருவாக்கு.” பக்கத்தின் பெயரை மாற்றுமாறும் ChatGPT இடம் கேட்கலாம்.
ஒரே பணிவெளியில் ஒரு பக்கத்தை மற்றொரு பக்கத்தின் கீழ் நகர்த்த, எந்தப் பக்கத்தை எங்கு நகர்த்த வேண்டும் என்று ChatGPT இடம் கூறவும். இரண்டு பக்கங்களிலும் உங்களுக்குத் திருத்தும் அனுமதி தேவை. நகர்த்துவதை உறுதிப்படுத்தும் முன், அணுகலில் ஏற்படும் மாற்றங்களைச் சரிபார்க்கவும்.
உங்கள் உள்ளடக்கத்தைக் கண்டறியவும்
உங்கள் படைப்புகளைக் கண்டறிய ChatGPT Space இல் இந்தக் காட்சிகளைப் பயன்படுத்தவும்:
அனைத்தும் > உங்கள் உருப்படிகள் என்பது பக்கங்கள், கோப்புகள், கோப்புறைகள் உள்ளிட்ட உங்கள் தனிப்பட்ட பணிவெளியின் உள்ளடக்கத்தைக் காட்டும்.
அனைத்தும் > உங்களுடன் பகிரப்பட்டவை என்பது உங்களுடனோ நீங்கள் அங்கம் வகிக்கும் குழுவுடனோ நேரடியாகப் பகிரப்பட்ட உருப்படிகளைக் காட்டும். பகிரப்பட்ட பணிவெளி வழியாக மட்டுமே நீங்கள் அணுகக்கூடிய உருப்படிகள் இங்கே தெரியாமல் இருக்கலாம்; அவற்றைக் கண்டறிய அந்தப் பணிவெளியைத் திறக்கவும்.
பக்கங்கள் என்பது உங்களுக்குச் சொந்தமான அல்லது உங்களுடன் பகிரப்பட்ட பக்கங்களைக் காட்டும். பட்டியலை வடிகட்ட உங்கள் உருப்படிகள் அல்லது உங்களுடன் பகிரப்பட்டவை என்பதைப் பயன்படுத்தவும். துணைப் பக்கங்களைக் கண்டறிய அவற்றின் முதன்மைப் பக்கத்தைத் திறக்கவும்.
பரிந்துரைக்கப்பட்டவை மற்றும் சமீபத்தியவை ஆகியவை சமீபத்தில் பயன்படுத்திய உள்ளடக்கத்தை மீண்டும் அணுக உதவும்.
படங்கள் பகுதியில் உங்கள் படைப்புகள் மற்றும் பதிவேற்றங்கள் தனித்தனியாகக் காட்டப்படும்.
கைபேசியில், ChatGPT Space தேடல் அல்லது ஒட்டுமொத்தத் தேடல் மூலம் பக்கங்களைக் கண்டறியவும். சமீபத்தில் பார்த்த பக்கங்கள் பரிந்துரைக்கப்பட்டவை பகுதியிலும் தோன்றும்.
பூட்டப்பட்ட அரட்டைகளிலிருந்து கோப்புகளைக் கண்டறிதல்
ஓர் அரட்டையில் பதிவேற்றிய அல்லது உருவாக்கிய கோப்புகள், அந்த அரட்டை பூட்டப்பட்டிருக்கும்போது ChatGPT Space-இல் மறைக்கப்படும். அந்தக் கோப்புகளை அவை முதலில் பதிவேற்றப்பட்ட அல்லது உருவாக்கப்பட்ட பூட்டிய அரட்டையில் மட்டுமே திறக்க முடியும். பூட்டப்பட்ட பிற அரட்டைகள் உட்பட வேறு எந்த அரட்டையிலும் அவற்றைத் திறக்க முடியாது.
அரட்டையைத் திறக்க, திட்டங்கள் > பூட்டப்பட்ட அரட்டைகள் என்பதற்குச் சென்று, உங்கள் கணக்கின் தனிப்பட்ட அடையாள எண்ணை உள்ளிடவும் அல்லது ஆதரிக்கப்படும் சாதன அங்கீகார முறையைப் பயன்படுத்தவும். ChatGPT Space-இல் உள்ள பிற இடங்களிலிருந்தோ இணைக்கப்பட்ட சேவைகளிலிருந்தோ சேர்க்கப்படும் கோப்புகளுக்கு, அவற்றின் தற்போதைய அணுகல் விதிகளே தொடர்ந்து பொருந்தும். அரட்டையின் பூட்டை நிரந்தரமாக நீக்கினால், அதன் பாதுகாக்கப்பட்ட கோப்புகள் ChatGPT Space-இல் சேமிக்கப்பட்டிருந்தால் அங்கு மீண்டும் தெரியும்.
கோப்புகளைச் சேர்த்து, இணைக்கப்பட்ட உள்ளடக்கத்தைப் பயன்படுத்தவும்
கோப்பை ஒரு பக்கத்தில் பதிவேற்றுகிறீர்களா அல்லது வேறிடத்தில் சேமிக்கப்பட்ட கோப்பிற்கான இணைப்பைச் சேர்க்கிறீர்களா என்பதைப் பொறுத்து கோப்பின் அணுகல் அமையும்:
ஒரு பக்கத்தில் பதிவேற்றப்பட்ட கோப்புகள் அந்தப் பக்கத்தின் அனுமதிகளைப் பின்பற்றும். பக்கத்தை அணுகக்கூடியவர்கள் அதில் பதிவேற்றப்பட்ட கோப்புகளையும் அணுக முடியும்.
தனியாகச் சேமிக்கப்பட்ட கோப்புகளுக்கான இணைப்புகள் மூலக் கோப்பை அணுகுவதற்கான அனுமதியை வாசகர்களுக்குத் தானாக வழங்காது. ChatGPT Space இல் சேமிக்கப்பட்ட கோப்புகளும் இணைக்கப்பட்ட சேவைகளில் உள்ள கோப்புகளும் இதில் அடங்கும்.
இணைக்கப்பட்ட சேவைகளில் உள்ள கோப்புகள் அசல் சேவையின் அனுமதிகளைத் தக்கவைத்துக்கொள்ளும். பக்கத்தைப் பகிர்வதால் மூலக் கோப்பை யாரெல்லாம் திறக்க முடியும் என்பது மாறாது.
நீங்களோ ChatGPT யோ ஒரு மூலத்திலிருந்து தகவலை நகலெடுத்து அல்லது சுருக்கி பகிரப்பட்ட பக்கத்தில் சேர்த்தால், பக்கத்தைப் பார்க்கக்கூடியவர்கள் அந்தத் தகவலைப் படிக்க முடியும். அசல் மூலத்தை அவர்களால் திறக்க முடியாவிட்டாலும் இது பொருந்தும்.
பகிர்ந்து இணைந்து பணியாற்றவும்
நீங்கள் தனிப்பட்ட ஒரு பக்கத்தைப் பகிரலாம் அல்லது தொடர்புடைய பக்கங்களிலும் கோப்புகளிலும் பிறருடன் இணைந்து பணியாற்ற ஒரு பணிவெளியைப் பகிரலாம்.
பக்கத்தைத் திறந்து பகிர் என்பதைத் தேர்ந்தெடுக்கவும். யாருடன் பகிர வேண்டும் என்பதையும், அவர்கள் அதைப் பார்க்கலாமா அல்லது திருத்தலாமா என்பதையும் தேர்வுசெய்யவும். திருத்தும் அனுமதி உள்ளவர்கள் நிகழ்நேரத்தில் இணைந்து மாற்றங்களைச் செய்யலாம்.
பக்கத்திற்கான நேரடி அழைப்பு மூலமோ, அதன் முதன்மைப் பக்கம் அல்லது அது இடம்பெறும் பணிவெளி மூலமோ அணுகல் கிடைக்கலாம். துணைப் பக்கங்கள் அவற்றின் முதன்மைப் பக்கத்தின் அணுகல் அனுமதிகளைப் பெறும்.
ஒருவரின் அணுகலை நீக்க, அது அவருக்கு எவ்வாறு கிடைத்தது என்பதைச் சரிபார்க்கவும். நேரடி அழைப்பை நீக்குவதால், முதன்மைப் பக்கம் அல்லது பணிவெளி வழியாகக் கிடைத்த அணுகல் நீங்காது. அவ்வாறு கிடைத்த அணுகலை நீக்க, அதை வழங்கும் முதன்மைப் பக்கம் அல்லது பணிவெளியின் பகிர்வு அமைப்புகளை மாற்றவும். பக்கத்தை நகர்த்துவதால், அதன் புதிய முதன்மைப் பக்கம் வழியாக அதை அணுகக்கூடியவர்களும் மாறலாம்.
Business மற்றும் Enterprise பணியிடங்களில், உங்கள் நிறுவனத்தின் பகிர்வு அமைப்புகள் பொருந்தும்.
இணைந்து பணியாற்றும் ஒவ்வொருவரும் அவரவரது ChatGPT உதவியுடன் செயல்படுவார்கள். பக்கத்தைப் பகிர்வதால் உங்கள் தனிப்பட்ட அரட்டைகளையோ உங்கள் ChatGPT மெமரியையோ பிறர் அணுக முடியாது. ஆனால், பக்கத்தில் எழுதப்பட்ட தகவல்கள் அதைப் பார்க்கும் அனுமதி உள்ள அனைவருக்கும் தெரியும். பகிர்வதற்கு முன் உள்ளடக்கத்தையும் அதன் அனுமதிகளையும் சரிபார்க்கவும்.
ஒரு பக்கத்தை நீக்கினால் என்ன நடக்கும்?
ஒரு பக்கத்தை நீக்கும்போது, அதுவும் அதன் துணைப் பக்கங்களும் குப்பைக்கு நகர்த்தப்படும். பிறருக்குச் சொந்தமான துணைப் பக்கங்களும் இதில் அடங்கும். முதன்மைப் பக்கத்தை நீக்கும் முன் அதன் துணைப் பக்கங்களைச் சரிபார்க்கவும்.
தனியுரிமை மற்றும் தரவுக் கட்டுப்பாடுகள்
மெமரி இயக்கப்பட்டிருந்தால், பக்கத்தை எழுத அல்லது புதுப்பிக்க உதவும்போது உங்களைப் பற்றிய தனிப்பட்ட சூழல் தகவல்களை ChatGPT பயன்படுத்தக்கூடும். அந்தத் தகவல் பக்கத்தில் எழுதப்பட்டதும், பக்கத்தைப் பார்க்கும் அனுமதி உள்ளவர்கள் அதைப் படிக்க முடியும்.
இணைந்து பணியாற்றும் ஒவ்வொருவரின் ChatGPT பகிரப்பட்ட உள்ளடக்கத்தைப் பயன்படுத்தும்போதும், அவரவரது பயிற்சி மற்றும் மெமரி அமைப்புகள் பொருந்தும். உங்களுடன் இணைந்து பணியாற்றுபவர் மெமரியை இயக்கியிருந்தால், உங்கள் மெமரி முடக்கப்பட்டிருந்தாலும் பகிரப்பட்ட பக்கத்தின் தகவல்களை அவரது ChatGPT நினைவில் வைத்துக்கொள்ளக்கூடும்.
ஒருவரின் ChatGPT பகிரப்பட்ட உள்ளடக்கத்தைப் படிக்கும்போதோ உருவாக்கும்போதோ, அவரது அமைப்புகளைப் பொறுத்து அந்த உள்ளடக்கம் பயிற்சிக்குப் பயன்படுத்தப்படலாம். எடுத்துக்காட்டாக, நீங்கள் பயிற்சியை முடக்கியிருந்தாலும், உங்களுடன் இணைந்து பணியாற்றுபவர் அதை இயக்கியிருந்தால், அவரது உரையாடல் மூலம் உங்கள் பங்களிப்புகள் பயிற்சிக்குப் பயன்படுத்தப்படக்கூடும். இயல்பாக, ChatGPT Business அல்லது Enterprise தரவுகளை OpenAI பயிற்சிக்குப் பயன்படுத்தாது.
பயிற்சி விருப்பத்தேர்வுகள் பற்றிய கூடுதல் தகவலுக்கு, ChatGPT இல் தரவுக் கட்டுப்பாடுகள் என்பதைப் பார்க்கவும். இதன் துணைக் கட்டுரையான ChatGPT இல் ChatGPT Space: பகிர்வு, தரவு மற்றும் கட்டுப்பாடுகள், பக்க அனுமதிகள், மெமரி மற்றும் பயிற்சி பற்றி மேலும் விரிவாக விளக்குகிறது.
உள்ளடக்கத்தைப் பற்றிப் புகாரளிக்கவும்
OpenAI கொள்கைகளை அல்லது சட்டத்தை மீறக்கூடிய உள்ளடக்கத்தைப் பற்றிப் புகாரளிக்க, உள்ளடக்கப் புகார் படிவத்தைப் பயன்படுத்தவும். அந்த உள்ளடக்கத்திற்கான இணைப்பைச் சேர்த்து, எதைப் பற்றிப் புகாரளிக்கிறீர்கள் என்பதை விளக்கவும்.
சிக்கல்களைத் தீர்த்தல்
என்னால் ஏன் பக்கத்தைத் திருத்த முடியவில்லை?
ஒரு பக்கத்தை மாற்ற, உங்களுக்குத் திருத்தும் அனுமதி தேவை. உங்களுக்கு ஏற்கெனவே திருத்தும் அனுமதி இருந்தால், இணையத்தில் அல்லது கணினிச் செயலியில் பக்கத்தைத் திறக்கவும். கைபேசியில் பக்கங்களைப் படிக்கவும் பகிரவும் முடியும், ஆனால் திருத்த முடியாது.
எனது பக்கத்திலிருந்து இணைக்கப்பட்ட கோப்பை மற்றொருவரால் ஏன் திறக்க முடியவில்லை?
வாசகர்களுக்கு பக்கத்தை மட்டுமின்றி மூலக் கோப்பையும் அணுகும் அனுமதி தேவை. பக்கத்தைப் பகிர்வதால் கோப்பின் அனுமதிகள் மாறாது.