நீங்கள் அணுகக்கூடிய விளம்பர மேலாளர் கணக்குகளுடன் விளம்பர மேலாளர் செருகுநிரல் இணைகிறது. இயல்பான மொழியில் பேசி, கணக்கின் கட்டமைப்பை ஆராயலாம், விளம்பரங்களை வரைந்து முன்னோட்டமிடலாம், உறுதிப்படுத்திய மாற்றங்களைச் செய்யலாம், செயல்திறனைப் புரிந்துகொள்ளலாம், விளம்பரக் காட்சிப்படுத்தல் சிக்கல்களைத் தீர்க்கலாம், முன்னுரிமைப்படுத்தப்பட்ட பரிந்துரைகளைப் பெறலாம்.

நீங்கள் செய்யக்கூடியவை

இணையதளம் அல்லது சுருக்கமான விளக்கத்திலிருந்து விளம்பரங்களை உருவாக்குங்கள்

பொதுவில் அணுகக்கூடிய இணையதளம் அல்லது தயாரிப்புப் பக்கத்தைப் பகிருங்கள், அல்லது நீங்கள் எதை விளம்பரப்படுத்த விரும்புகிறீர்கள் என்பதை விவரியுங்கள். செருகுநிரலால் செய்யக்கூடியவை:

• உங்கள் இணையதளம் அல்லது சுருக்கமான விளக்கத்திலிருந்து விளம்பரத் தலைப்பையும் விளக்கத்தையும் வரைதல்

• உங்கள் இணையதளத்தில் பொருத்தமான படத்தைக் கண்டறிதல், நீங்கள் வழங்கும் படத்தைப் பயன்படுத்துதல், தகுதியான படைப்பாக்க உள்ளடக்கத்தை மீண்டும் பயன்படுத்துதல், அல்லது புதிய படத்தை உருவாக்கும் விருப்பத்தை நீங்கள் தேர்ந்தெடுத்ததும் அதை உருவாக்குதல்

• ஒரு விளம்பரத்தை அல்லது ஒரே அங்கீகரிக்கப்பட்ட படம், பட வெட்டு, சென்றடையும் பக்கம் ஆகியவற்றைப் பயன்படுத்தும் வழக்கமான விளம்பர மாறுபாடுகளின் ஒருங்கிணைந்த தொகுப்பை உருவாக்குதல்

• எதையும் பதிவேற்றுவதற்கு அல்லது சேமிப்பதற்கு முன் உங்களுக்கு முன்னோட்டம் காட்டுதல்

• ஏற்கெனவே உள்ள பிரச்சாரத்திலும் விளம்பரக் குழுவிலும் விளம்பரத்தைச் சேர்த்தல், அல்லது தேவைப்படும் பிரச்சாரக் கட்டமைப்பை உருவாக்குதல்

• அங்கீகரிக்கப்பட்ட படைப்பாக்க உள்ளடக்கத்தைப் பதிவேற்றி, நீங்கள் உறுதிப்படுத்தும் நிலையில் விளம்பரத்தை உருவாக்குதல்

எதையும் உருவாக்குவதற்கு முன், உங்கள் ஒப்புதலுக்காகச் சென்றடையும் பக்கம், படம், விளம்பர வாசகங்கள், பிரச்சார அமைப்புகள், செலவுத்திட்டம், இலக்கு நிர்ணயம் மற்றும் தொடர்புடைய பிற விவரங்களைச் செருகுநிரல் காட்டும்.

படைப்பாக்க வழிகாட்டுதலுக்கு, ChatGPT விளம்பரங்களுக்கான விளம்பரங்களை உருவாக்குதல் என்பதைப் பார்க்கவும்.

ஏற்கெனவே உள்ள தயாரிப்புத் தரவூட்டத்திலிருந்து விளம்பரங்களை உருவாக்குங்கள்

உங்கள் கணக்கில் தகுதியான தயாரிப்புத் தரவூட்டம் இருந்தால், செருகுநிரலால் தயாரிப்புத் தரவூட்டப் பிரச்சாரம், விளம்பரக் குழு, விளம்பர வார்ப்புரு ஆகியவற்றை உருவாக்க முடியும். தயாரிப்புப் படங்கள் தரவூட்டத்திலிருந்து பெறப்படுகின்றன. ஒவ்வொரு தயாரிப்புத் தரவூட்ட விளம்பரக் குழுவிலும் காப்பகப்படுத்தப்படாத ஒரு விளம்பர வார்ப்புருவைப் பயன்படுத்தலாம்.

தயாரிப்புத் தரவூட்டங்களிலிருந்து பிரச்சாரங்களை உருவாக்குதல் என்பதைப் பார்க்கவும்.

பிரச்சாரங்கள், விளம்பரக் குழுக்கள், விளம்பரங்களை நிர்வகியுங்கள்

கணக்கு, பிரச்சாரம், விளம்பரக் குழு அல்லது விளம்பரத்தை அதன் பெயரைக் கொண்டு கண்டறியுமாறு செருகுநிரலிடம் கேட்கலாம். இதனால் செய்யக்கூடியவை:

• தற்போதைய அமைப்புகளையும் நிலைகளையும் ஆய்வு செய்தல்

• பிரச்சாரம் அல்லது விளம்பரக் குழுவை நேரடியாக உருவாக்குதல்

• ஏற்கெனவே உள்ள விளம்பரத்தை முன்னோட்டமிடுதல்

• ஆதரிக்கப்படும் பிரச்சாரம், விளம்பரக் குழு மற்றும் விளம்பர அமைப்புகளைப் புதுப்பித்தல்

• ஆதரிக்கப்படும் வளங்களை இடைநிறுத்துதல், செயல்படுத்துதல் அல்லது காப்பகப்படுத்துதல்

• ஏற்கெனவே உள்ள விளம்பரப் படத்தை மாற்றுதல்

ஒவ்வொரு மாற்றமும் குறிப்பிட்ட ஒரு வளத்திற்கு மட்டுமே பொருந்தும். ஒப்புதல் கேட்பதற்கு முன், கணக்கு, தற்போதைய நிலை, முன்மொழியப்படும் நிலை, மாறவிருக்கும் துல்லியமான மதிப்புகள் ஆகியவற்றைச் செருகுநிரல் காட்டும். புதுப்பிப்பு வெற்றிகரமாக முடிந்ததும், முடிவைச் சரிபார்க்க அந்த வளத்தை மீண்டும் படிக்கும்.

ChatGPT விளம்பரங்களுக்கான பிரச்சாரங்களை உருவாக்குதல் மற்றும் பிரச்சாரங்களைத் திருத்துதல் ஆகியவற்றைப் பார்க்கவும்.

செயல்திறனையும் மாற்றுச் செயல்களையும் பகுப்பாய்வு செய்யுங்கள்

முழுக் கணக்கின் முடிவுகளையோ, ஒரு பிரச்சாரம், விளம்பரக் குழு அல்லது விளம்பரத்தின் முடிவுகளையோ செருகுநிரலால் பகுப்பாய்வு செய்ய முடியும். இதைப் பயன்படுத்தி நீங்கள் செய்யக்கூடியவை:

• பிரச்சாரங்கள், விளம்பரக் குழுக்கள் அல்லது விளம்பரங்களை ஒப்பிட்டுத் தரவரிசைப்படுத்துதல்

• காட்சிப்படுத்தல்கள், சொடுக்கல்கள், செலவு, சொடுக்கல் விகிதம், ஒரு சொடுக்கலுக்கான சராசரிச் செலவு, ஆயிரம் காட்சிப்படுத்தல்களுக்கான சராசரிச் செலவு ஆகியவற்றை ஆய்வு செய்தல்

• மாற்றுச் செயல் அளவீடு அமைக்கப்பட்டிருந்தால், விளம்பரங்களால் நிகழ்ந்ததாகக் கணக்கிடப்பட்ட மாற்றுச் செயல்களைப் பகுப்பாய்வு செய்தல்

• தேர்ந்தெடுத்த தேதிக் காலவரம்பில் உள்ள போக்குகளை ஆராய்தல்

• ஆதரிக்கப்படும் முடிவுகளை நேரம், சாதனம், நாடு அல்லது துணை வளத்தின் அடிப்படையில் பிரித்துப் பார்த்தல்

• மாற்றுச் செயல்களின் மூலங்களையும் அமைப்புகளையும் ஆய்வு செய்தல், அல்லது சிக்கல்களைக் கண்டறியச் சமீபத்திய மாற்றுச் செயல் நிகழ்வுகளின் மூலத் தரவைச் சோதித்தல்

நீங்கள் தேதிக் காலவரம்பைக் குறிப்பிடாவிட்டால், கணக்கின் உள்ளூர் நேர மண்டலத்தின்படி முடிவடைந்த கடந்த ஏழு நாட்களைச் செருகுநிரல் இயல்பாகப் பயன்படுத்தும். வழக்கமான அறிக்கையிடல் மற்றும் விளம்பரப் பங்களிப்பைக் கணக்கிடுவதில் ஏற்படும் தாமதங்கள் உட்பட, விளம்பர மேலாளரில் தற்போது கிடைக்கும் தரவையே முடிவுகள் பிரதிபலிக்கும்.

முடிவுகளை அளவிடுதல் மற்றும் மாற்றுச் செயல் அளவீடு ஆகியவற்றைப் பார்க்கவும்.

ஒருமுறை அல்லது குறிப்பிட்ட இடைவெளிகளில் பரிந்துரைகளைப் பெறுங்கள்

செயலில் உள்ள உங்கள் பிரச்சாரங்களை ஒருமுறை ஆய்வு செய்யுமாறு செருகுநிரலிடம் கேளுங்கள், அல்லது தொடர்ந்து செயல்திறனைக் கண்காணிக்கத் தினசரி அல்லது வாராந்திர ஆய்வுகளைத் திட்டமிடுங்கள். இது தயார்நிலை, காட்சிப்படுத்தல், அளவீடு ஆகியவற்றைச் சரிபார்த்து, செலவுத்திட்டம், ஏலத்தொகை நிர்ணயம், இலக்கு நிர்ணயம், விளம்பர வாசகங்கள், படைப்பாக்க உள்ளடக்கம் ஆகியவற்றில் மேம்படுத்தக்கூடிய வாய்ப்புகளுக்கு முன்னுரிமை அளிக்கிறது. ஆய்வுகளில் ஆதாரங்களும் தெளிவான அடுத்த படிகளும் இடம்பெறும். ஆனால் அவை உங்கள் கணக்கில் ஒருபோதும் மாற்றங்களைச் செய்யாது. குறிப்பிட்ட இடைவெளிகளில் நடைபெறும் ஆய்வின் அட்டவணையை உறுதிப்படுத்துவதற்கு முன், அதன் முன்னோட்டத்தைப் பார்க்கலாம்.

காட்சிப்படுத்தல் சிக்கல்களைத் தீர்க்குங்கள்

ஒரு பிரச்சாரத்தின் விளம்பரங்கள் காட்சிப்படுத்தப்படவில்லை அல்லது அவற்றின் காட்சிப்படுத்தல் அளவு அதிகரிக்கவில்லை என்றால், கணக்கு, பிரச்சாரம், விளம்பரக் குழு, விளம்பரம், அளவீடு என ஒவ்வொரு நிலையையும் செருகுநிரலால் ஆய்வு செய்ய முடியும். இது ஆதாரங்களால் உறுதிப்படுத்தப்படும் முதல் தடையைக் கண்டறிந்து, கணக்கில் காணப்படும் ஆதாரங்களையும் அவற்றின் விளக்கத்தையும் தனித்தனியாகக் காட்டி, முன்னுரிமைப்படுத்தப்பட்ட மீட்புத் திட்டத்தை வழங்குகிறது. சிக்கல் கண்டறிதல் தகவல்களைப் படிப்பதோடு மட்டுமே நின்றுவிடும்; மாற்றங்களைச் செய்யாது.

பொதுவான சிக்கல்களைத் தீர்த்தல் என்பதைப் பார்க்கவும்.

வணிக விளம்பரக் கணக்கை அமைத்து நிர்வகியுங்கள்

சுயமாகக் கணக்கை அமைக்கும் வசதி கிடைக்கும் இடங்களில், வணிக விளம்பரதாரர் தனது சொந்த வணிகத்திற்கு ஒரு விளம்பரக் கணக்கை உருவாக்கச் செருகுநிரல் வழிகாட்டும். பின்வருவனவற்றைச் செய்ய இது உங்களுக்கு உதவும்:

• வணிகம், இணையதளம், கணக்கு, தொழில்துறை, நாடு, நாணயம், நேர மண்டலம் ஆகிய விவரங்களை உள்ளிடுதல்

• இலச்சினையை இணைத்தல், துல்லியமான பட இணைப்பைப் பயன்படுத்துதல், இலச்சினையை உருவாக்கும் விருப்பத்தைத் தேர்ந்தெடுத்த பின் அதை உருவாக்குதல், அல்லது இலச்சினையைப் பின்னர் சேர்க்க ஒத்திவைத்தல்

• கணக்கின் உரிமையாளராக இருக்க வேண்டிய வணிகத்தைத் தேர்ந்தெடுத்தல்

• இறுதி விவரங்களைச் சரிபார்த்து, பொருந்தும் விதிமுறைகளை வெளிப்படையாக ஏற்றுக்கொள்ளுதல்

ஏற்கெனவே உள்ள கணக்கில், பயனர்களையும் நிலுவையிலுள்ள அழைப்புகளையும் பட்டியலிடுதல், பயனர்களை அழைத்தல், பங்குகளை மாற்றுதல், செயலில் உள்ள பயனர்களை அகற்றுதல், கணக்கின் இலச்சினையை மாற்றுதல் ஆகியவற்றையும் செருகுநிரலால் செய்ய முடியும். மாற்றாகச் சேர்க்கப்படும் இலச்சினை வணிக அடையாள மதிப்பாய்வுக்கு அனுப்பப்படும். அது அங்கீகரிக்கப்படும் வரை, தற்போது பொதுவில் காட்டப்படும் இலச்சினையே தொடர்ந்து பயன்பாட்டில் இருக்கும்.

அடையாளச் சரிபார்ப்பு, கட்டணக் கணக்கீடு, பணம் செலுத்துதல், வரி மற்றும் பிற தயார்நிலைப் படிகளை விளம்பர மேலாளரிலேயே முடிக்க வேண்டும். விளம்பர மேலாளர் கணக்கை அமைத்தல் என்பதைப் பார்க்கவும்.

உறுதிப்படுத்தல்கள் எவ்வாறு செயல்படுகின்றன

தகவல்களை ஆய்வு செய்வதையும் மாற்றம் செய்வதையும் செருகுநிரல் வேறுபடுத்துகிறது:

• கணக்குத் தரவைப் படித்தல், செயல்திறனைப் பகுப்பாய்வு செய்தல், சிக்கல்களைக் கண்டறிதல், பரிந்துரைகளுக்காக ஆய்வு செய்தல் ஆகியவை உங்கள் கணக்கில் மாற்றங்களைச் செய்யாது.

• விளம்பரத்தை வரைவு செய்வதோ முன்னோட்டமிடுவதோ அதைப் பதிவேற்றாது அல்லது வெளியிடாது.

• படைப்பாக்க உள்ளடக்கத்தைப் பதிவேற்றுவதற்கும், கணக்கு, பிரச்சாரம், விளம்பரக் குழு, விளம்பரம், இலச்சினை அல்லது பயனர் அணுகலை உருவாக்குவதற்கும் புதுப்பிப்பதற்கும், செய்யவிருக்கும் குறிப்பிட்ட செயலை நீங்கள் உறுதிப்படுத்த வேண்டும்.

• கணக்கை உருவாக்க, விளம்பர விதிமுறைகள் மற்றும் பிரைவசி பாலிசி ஆகியவற்றையும் வெளிப்படையாக ஏற்றுக்கொள்ள வேண்டும்.

ஒப்புதல் அளித்த பிறகு முன்மொழியப்பட்ட விவரங்களில் ஏதேனும் மாறினால், செருகுநிரல் புதுப்பிக்கப்பட்ட முன்மொழிவைக் காட்டி, தொடர்வதற்கு முன் மீண்டும் ஒப்புதல் கேட்கும்.

கோரிக்கை எடுத்துக்காட்டுகள்

• “இந்தத் தயாரிப்புப் பக்கத்திலிருந்து ஆறு விளம்பர மாறுபாடுகளை உருவாக்கு.”

• “செயலில் உள்ள எனது தரவூட்டத்தைப் பயன்படுத்தித் தயாரிப்புத் தரவூட்டப் பிரச்சாரத்தை உருவாக்கு.”

• “முடிவடைந்த கடந்த ஏழு நாட்களில் எனது பிரச்சாரங்களை ஒப்பிடு.”

• “எனது வசந்தகால அறிமுகப் பிரச்சாரத்தின் விளம்பரங்கள் ஏன் காட்சிப்படுத்தப்படவில்லை?”

• “செயலில் உள்ள எனது பிரச்சாரங்களைத் தலைமைச் சந்தைப்படுத்தல் அதிகாரியின் பார்வையில் ஆய்வு செய்து தா.”

• “பரிந்துரைகளை மட்டும் வழங்கும் வாராந்திர ஆய்வை அமை.”

• “எனது வணிக அடையாள விழிப்புணர்வுப் பிரச்சாரத்தை இடைநிறுத்து.”

• “எனது குழு உறுப்பினரை இந்த விளம்பரக் கணக்கில் உறுப்பினராக அழை.”

• “எனது வணிகத்திற்கு ஒரு விளம்பரக் கணக்கை உருவாக்க உதவு.”

கணக்கு அல்லது பிரச்சாரத்தின் பெயரையும் தேதிக் காலவரம்பையும் சேர்த்தால், பொதுவாக இன்னும் துல்லியமான முடிவைப் பெறலாம். வளங்களின் உள் அடையாள எண்களை நீங்கள் வழங்க வேண்டியதில்லை.

தற்போதைய வரம்புகள்

• நீங்கள் இணைத்துள்ள விளம்பர மேலாளர் பயனருக்கு அணுகல் உள்ள கணக்குகளையும் வளங்களையும் மட்டுமே செருகுநிரலால் அணுக முடியும். கிடைக்கும் செயல்கள் உங்கள் பங்கையும் கணக்கில் இயக்கப்பட்டுள்ள அம்சங்களையும் பொறுத்தது.

• ஒருங்கிணைந்த பல விளம்பரங்களுக்கான கோரிக்கையில் வழக்கமான விளம்பரங்கள் மட்டுமே ஆதரிக்கப்படும். ஒரு கோரிக்கையில் அதிகபட்சம் 50 புதிய விளம்பரங்களை உருவாக்கலாம். அனைத்து மாறுபாடுகளும் ஒரே அங்கீகரிக்கப்பட்ட படம், பட வெட்டு, சென்றடையும் பக்கம் ஆகியவற்றைப் பகிர்ந்துகொள்ளும்.

• ஒரு தயாரிப்புத் தரவூட்ட விளம்பரக் குழுவில் காப்பகப்படுத்தப்படாத ஒரு விளம்பர வார்ப்புருவைப் பயன்படுத்தலாம். வணிக ஏஜென்ட் விளம்பரங்களை உருவாக்குவது ஆதரிக்கப்படவில்லை.

• கட்டணக் கணக்கீடு, பணம் செலுத்தும் முறைகள், வரி விவரங்கள், சட்டப்பூர்வ அடையாளத் தகவல்கள், மேல்முறையீடுகள் ஆகியவற்றை நேரடியாக விளம்பர மேலாளரில் முடிக்க வேண்டும்.

• குறிப்பிட்ட இடைவெளிகளில் நடைபெறும் ஆய்வுகள் பரிந்துரைகளை மட்டுமே வழங்கும்; பிரச்சாரங்களில் தானாக மாற்றங்களைச் செய்யாது.

• மாற்றுச் செயல் நிகழ்வுகளின் மூலத் தரவைக் கொண்டு சிக்கல்களைக் கண்டறிவது, கடந்த 15 நிமிடங்களில் நிகழ்ந்த சமீபத்திய 50 நிகழ்வுகளுக்கு மட்டுமே உட்பட்டது. இது வரலாற்றுத் தரவு அறிக்கையிடல் அல்ல. செருகுநிரல் மாற்றுச் செயல்களின் மதிப்பைப் பெறுவதில்லை. எனவே, வருவாய் அல்லது விளம்பரச் செலவுக்கான வருமானத்தை இது அறிக்கையிடாது.

• சரிபார்ப்பு, கொள்கை மதிப்பாய்வு, கணக்குத் தகுதி அல்லது காட்சிப்படுத்தல் குறித்த முடிவுகளைச் செருகுநிரலால் மீற முடியாது.

அடிக்கடி கேட்கப்படும் கேள்விகள்

விளம்பரத்தை வரைவு செய்ய எனக்கு விளம்பர மேலாளர் கணக்கு தேவையா?

இல்லை. கணக்கைத் தேர்ந்தெடுப்பதற்கு முன்பே நீங்கள் படைப்பாக்க உள்ளடக்கத்தை வரைவு செய்து முன்னோட்டமிடலாம். படைப்பாக்க உள்ளடக்கத்தைப் பதிவேற்ற அல்லது விளம்பரத்தைச் சேமிக்க, மாற்றங்களைச் செய்வதற்கான அணுகல் அனுமதியுடன் கூடிய தகுதியான விளம்பர மேலாளர் கணக்கு தேவை.

செருகுநிரலால் ஒரே நேரத்தில் பல விளம்பரங்களை உருவாக்க முடியுமா?

ஆம். ஒரே அங்கீகரிக்கப்பட்ட படம், பட வெட்டு, சென்றடையும் பக்கம் ஆகியவற்றைப் பகிர்ந்துகொள்ளும் வழக்கமான விளம்பர மாறுபாடுகளின் ஒருங்கிணைந்த தொகுப்பை இது உருவாக்கும். ஒரு கோரிக்கையில் அதிகபட்சம் 50 புதிய விளம்பரங்களை உருவாக்கலாம். ஒவ்வொரு தயாரிப்புத் தரவூட்ட விளம்பரக் குழுவிலும் காப்பகப்படுத்தப்படாத ஒரு விளம்பர வார்ப்புருவைப் பயன்படுத்தலாம்.

என்னிடம் கேட்காமல் செருகுநிரல் மாற்றம் செய்யுமா?

இல்லை. படைப்பாக்க உள்ளடக்கத்தைப் பதிவேற்றுவதற்கு அல்லது விளம்பர மேலாளர் வளங்களை உருவாக்குவதற்கு அல்லது புதுப்பிப்பதற்கு முன், முழுமையான முன்மொழிவைக் காட்டி உறுதிப்படுத்தும்படி இது கேட்கும்.

குறிப்பிட்ட இடைவெளிகளில் நடைபெறும் ஆய்வுகளால் எனது பிரச்சாரங்களைத் தானாக மேம்படுத்த முடியுமா?

இல்லை. ஒருமுறை நடைபெறும் ஆய்வுகளும் திட்டமிடப்பட்ட ஆய்வுகளும் தகவல்களைப் படிப்பதோடு மட்டுமே நின்றுவிடும்; மாற்றங்களைச் செய்யாது. அவை பரிந்துரைகளை வழங்கும். அதன் தொடர்ச்சியாகச் செய்யக்கூடிய ஆதரிக்கப்படும் எந்த மாற்றமும் உங்கள் ஒப்புதலுக்காகத் தனியாக முன்வைக்கப்படும்.

ஒரு பிரச்சாரத்தின் விளம்பரங்கள் காட்சிப்படுத்தப்படும் என்று செருகுநிரலால் உத்தரவாதம் அளிக்க முடியுமா?

இல்லை. தனது ஆதரவு வரம்பிற்குள் உள்ள தடைகளைக் கண்டறியவும், செயல்திறனைப் பகுப்பாய்வு செய்யவும், அடுத்த படிகளைப் பரிந்துரைக்கவும் இதனால் முடியும். ஆனால் காட்சிப்படுத்தல் என்பது கணக்கின் தயார்நிலை, மதிப்பாய்வு, இலக்கு நிர்ணயம், செலவுத்திட்டம், கிடைக்கும் வாய்ப்புகள் மற்றும் பிற விளம்பர மேலாளர் காரணிகளையே சார்ந்துள்ளது.

எனக்காகக் கட்டணக் கணக்கீடு அல்லது அடையாளச் சரிபார்ப்பைச் செருகுநிரலால் நிர்வகிக்க முடியுமா?

இல்லை. கணக்கு அமைப்பின் நிலையை வரையறுக்கப்பட்ட அளவில் சரிபார்த்து, பொருத்தமான அடுத்த படிக்கு இது வழிகாட்டும். ஆனால் கட்டணக் கணக்கீடு, பணம் செலுத்துதல், வரி, சட்டப்பூர்வ அடையாளம் தொடர்பான செயல்முறைகளை விளம்பர மேலாளரிலேயே முடிக்க வேண்டும்.